വലിയ തുകയടച്ച് ഇൻഷൂറൻസ് സ്വന്തമാക്കാൻ സാധിക്കാത്തവർക്ക് ആശ്വാസ വാർത്ത. നിങ്ങൾക്കും കുറഞ്ഞ ചെലവിൽ പത്ത് ലക്ഷം രൂപയുടെ പോളിസി സ്വന്തമാക്കാം. പോസ്റ്റ് ഓഫീസിന്റെ പെയ്‌മെന്റ് ബാങ്ക് വഴിയാണ് ഈ സൗകര്യം ലഭിക്കുന്നത്. 299 രൂപ, 399 രൂപ വാർഷിക പ്രീമിയത്തിലാണ് പോളിസി ലഭിക്കുന്നത്. എല്ലാം പോസ്റ്റ് ഓഫീസിലും ഈ സൗകര്യം ലഭ്യമാണ്. ഇൻഷൂർ ചെയ്യപ്പെട്ട വ്യക്തിക്ക് അപകടമരണം സംഭവിച്ചാൽ പത്ത് ലക്ഷം രൂപവരെ ആശ്രിതർക്ക് ലഭിക്കും. 399 രൂപയുടെ പോളിസിയിൽ ചില അധിക ആനുകൂല്യങ്ങളും ലഭിക്കുന്നുണ്ട്.
ആർക്കൊക്കെ അംഗങ്ങളാകാം
പദ്ധതിയിൽ ചേരാനുള്ള പ്രായ പരിധി 18 വയസിനും 65 വയസിനും ഇടയിലാണ്. പോളിസി കാലാവധി ഒരു വർഷമാണ്. ഇന്ത്യ പോസ്റ്റ് പെയ്മന്റ് ബാങ്ക് ഉപഭോക്താക്കൾക്കാണ് പോളിസി ലഭ്യമാകുന്നത്. ഇൻഷൂറസ് എടുക്കാനായി പോകുമ്പോൾ ആധാർകാർഡ്, പാൻകാർഡ്, ആക്റ്റീവ് ആയ ഇമെയിൽ ഐഡി, മൊബൈൽ നമ്പർ (മൊബൈൽ നമ്പറിൽ ഒറ്റിപി ലഭ്യമാകും) എന്നിവ കൂടെ കരുതണം.
ഇൻഷൂറൻസിലൂടെ ലഭിക്കുന്നത്
പോസ്റ്റ് ഓഫീസ് ഇൻഷൂറൻസ് പ്രധാനമായും അപകട പരിരക്ഷയാണ് നൽകുന്നത്. അപകട മരണങ്ങൾ, അപകടത്തെ തുടർന്നുണ്ടായ ശാരീരിക വൈകല്യങ്ങൾക്ക് എന്നിവയ്‌ക്ക് 10 ലക്ഷം രൂപയുടെ സാമ്പത്തിക സഹായം ലഭിക്കും. അപകടം പറ്റിയ വ്യക്തിയുടെ ആശുപത്രി ചെലവും ഇതിൽ ഉൾപ്പെടും. ഇൻഷൂർ ചെയ്യപ്പെട്ട വ്യക്തി മരണപ്പെട്ടാൽ മരണാനന്തര കർമങ്ങൾക്ക് ധനസഹായം ലഭിക്കും. കൂടാതെ മക്കൾക്ക് തുടർ വിദ്യാഭ്യാസ ധനസഹായം എന്നിവ ഈ പോളിസി വഴി ലഭിക്കും.
ഇൻഷൂറൻസിലൂടെ ആശുപത്രി ചെലവ്
അപകടത്തിൽപ്പെട്ടയാളുടെ ആശുപത്രി ചെലവോ അല്ലെങ്കിൽ 60,000 രൂപയോ ഏതാണ് കുറവ് എന്നത് അനുസരിച്ച് തുക ലഭിക്കും.
കിടത്തി ചികിത്സയ്‌ക്കാണ് 60,000 രൂപ വരെ അനുവദിക്കുന്നത് അല്ലാത്ത പക്ഷം 30,000 രൂപ വരെ അനുവദിക്കും. ഈ ആനുകൂല്യങ്ങൾ 299 രൂപ, 399 രൂപ പോളിസികളിൽ പൊതുവായി ലഭിക്കും.
