മോഹൻലാൽ ആദ്യമായി സംവിധായകനാവുന്ന ചിത്രമാണ് ‘ബറോസ്’. ഏറെ പ്രതീക്ഷയോടെ മലയാള സിനിമാ ലോകവും പ്രേക്ഷകരും മോഹൻലാൽ ആരാധകരും കാത്തിരിക്കുന്ന ചിത്രമാണിത്. ഇപ്പോഴിതാ, ആവേശകരമായ ഒരു വാർത്തയാണ് സിനിമയുടെ അണിയറ പ്രവർത്തകർ പുറത്തു വിട്ടിരിക്കുന്നത്. ബറോസിന് സംഗീതം പകരാൻ മ്യൂസിഷനായ മാർക്ക് കിലിയൻ എത്തിയ സന്തോഷം പങ്കുവയ്ക്കുകയാണ് മോഹൻലാൽ.
ദക്ഷിണാഫ്രിക്കൻ സ്വദേശിയാണ് മാർക്ക് കിലിയൻ. ലോസ് ഏഞ്ചൽസിലാണ് താരത്തിന്റെ താമസം. ഒസ്കാർ നേടിയ സോറ്റ്സി, ഐ ഇൻ ദി സ്കൈ, ട്രൈറ്റർ തുടങ്ങിയ ചിത്രങ്ങളിലെ മാർക്ക് കിലിയന്റെ സ്കോറുകൾ ഏറെ പ്രശസ്തമാണ്. സന്തോഷ് ശിവൻ സംവിധാനം ചെയ്ത ‘ബിഫോർ ദ റെയിൻസ്’ എന്ന ചിത്രത്തിൽ ഇതിന് മുമ്പ് മാർക്ക് കിലിയൻ സംഗീതം നൽകിയിട്ടുണ്ട്.
വാസ്കോഡഗാമയുടെ നിധി സൂക്ഷിപ്പുകാരനായ ഭൂതത്തിന്റെ കഥയാണ് ബറോസ് പറയുന്നത്. നിധി തേടി ഒരു കുട്ടി ബറോസിനു മുന്നിലെത്തുന്നതാണ് കഥയുടെ പ്രമേയം. ‘ബാറോസ്: ഗാര്ഡിയന് ഓഫ് ഡി ഗാമാസ് ട്രെഷര്’ എന്ന പേരിലെ നോവല് അടിസ്ഥാനമാക്കിയാണ് ജിജോ പുന്നൂസ് തിരക്കഥയൊരുക്കിയത്. ബാറോസ് എന്ന നിധി സൂക്ഷിപ്പുകാരന്റെ വേഷമാണ് ചിത്രത്തിൽ മോഹന്ലാലിന്. സന്തോഷ് ശിവനാണ് ബറോസിന്റെ ഛായാഗ്രാഹകൻ.
