മുംബൈ : മഹാരാഷ്ട്രയിലെ ലാത്തുർ നഗരത്തിന്റെ കിഴക്കൻ ഭാഗങ്ങളിൽ നിഗൂഢമായ ഭൂഗർഭ ശബ്ദങ്ങൾ റിപ്പോർട്ടു ചെയ്തു. എന്നാൽ ഭൂകമ്പത്തിന് സാധ്യതയോ സമാനമായ സാഹചര്യമോ സ്ഥീതീകരിച്ചിട്ടില്ലെന്നും അധികൃതർ അറിയിച്ചു. വിവേകാനന്ദ ചൗക്കിന് സമീപം രാവിലെ 10:30-നും 10:45-നും ഇടയിലാണ് ശബ്ദം ഉണ്ടായത്. സംഭവത്തെ തുടർന്ന് പ്രദേശവാസികൾ പരിഭ്രാന്തിയിലാണ്.
ലാത്തൂർ നഗരത്തിലെ ഭൂചലന കേന്ദ്രങ്ങളിൽ നിന്നും ജില്ലയിലെ ഔരദ് ഷഹാജ്‌നി, ആഷിവ് എന്നീ കേന്ദ്രങ്ങളിൽ നിന്നും ദുരന്തനിവാരണ വകുപ്പ് വിവരങ്ങൾ ശേഖരിച്ചു. എന്നാൽ ഇത് വരെ ഭൂകമ്പ സാധ്യതകളൊന്നും സ്ഥിതീകരിച്ചിട്ടില്ലെന്ന് അധികൃതർ അറിയിച്ചു. ഈ വർഷം ഫെബ്രുവരി 4-ന് തഹസിലിലെ നിറ്റൂർ-ഡംഗേവാഡി പ്രദേശങ്ങളിലും സമാന രീതിയിലുള്ള ശബ്ദങ്ങൾ കേട്ടതായി റിപ്പോർട്ട് ചെയ്തിരുന്നു.
1993-ൽ മഹാരാഷ്ട്രയിലെ കില്ലാരി ഗ്രാമത്തിലും സമീപ പ്രദേശങ്ങളിലും ഭൂകമ്പത്തിൽ 10,000 പേർ കൊല്ലപ്പെട്ടിരുന്നു. മറത്ത്വാഡ പ്രദേശങ്ങളിൽ സമാനരീതിയിൽ ശബ്ദങ്ങൾ ഉണ്ടാകുന്നതായി റിപ്പോർട്ട് ചെയ്തിരുന്നുവെന്ന് ഡിസാസ്റ്റർ മാനേജ്‌മെന്റ് ഓഫീസർ സാകേബ് ഉസ്മാനി പറഞ്ഞു. കഴിഞ്ഞ വർഷം സെപ്റ്റംബറിൽ ഹസോരി കില്ലാരി പ്രദേശങ്ങളിലും ശബ്ദങ്ങൾ മുഴങ്ങുന്നതായി റിപ്പോർട്ടുകളുണ്ട്.
