ബെംഗളൂരു: അടുത്തിടെയാണ് ഡൽഹി-മുംബൈ എക്സ്പ്രസ് വേയുടെ ആദ്യ ഘട്ടം പ്രധാനമന്ത്രി നരേന്ദ്രമോദി ഉദ്ഘാടനം ചെയ്തത്. രാജ്യത്തുടനീളം വിവിധ സംസ്ഥാനങ്ങളിലായി അനവധി എക്സ്പ്രസ് വേകളാണ് മോദി സർക്കാരിന്റെ കീഴിൽ ഇതുവരെ യാഥാർത്ഥ്യമായത്.
ഇനിയും നിരവധി അതിവേഗ പാതകൾ നിർമാണ ഘട്ടത്തിൽ തുടരുകയാണ്. രാജ്യത്തിന്റെ മുഖഛായ തന്നെ മാറ്റിമറിക്കാൻ സാധിക്കുന്നവയാണ് റോഡുകൾ എന്നതിനാൽ എക്സ്പ്രസ് വേകൾ യാഥാർത്ഥ്യമാകുന്നതോടെ ഇന്ത്യയുടെ വികസന യാത്രയുടെ വേഗതയും വർധിക്കുന്നു. ഇപ്പോഴിതാ.. ബെംഗളൂരു – മൈസൂരു എക്സ്പ്രസ് വേയുടെ അതിമനോഹരമായ ചിത്രങ്ങളാണ് സമൂഹമാദ്ധ്യമങ്ങൾ കീഴടക്കുന്നത്.
Magnificent aerial clicks symbolize how global-standard infrastructure is transforming 🇮🇳#Bengaluru_Mysuru_Expressway#PragatiKaHighway #GatiShakti #BuildingTheNation
Courtesy: @yt_droneman pic.twitter.com/Z9rlGec40l
— Nitin Gadkari (@nitin_gadkari) February 16, 2023
വരുന്ന മാർച്ചിലാണ് ബെംഗളൂരു – മൈസൂരു എക്സ്പ്രസ് വേ പ്രധാനമന്ത്രി നാടിനായി സമർപ്പിക്കുക. ഉദ്ഘാടന ചടങ്ങിന് ഏതാനും നാളുകൾ മാത്രം ശേഷിക്കുന്ന സാഹചര്യത്തിലാണ് എക്സ്പ്രസ് വേയുടെ ആകാശ ദൃശ്യങ്ങൾ കേന്ദ്ര റോഡ് ഗതാഗതമന്ത്രി നിതിൻ ഗഡ്കരി പങ്കുവച്ചിരിക്കുന്നത്. എക്സ്പ്രസ് വേയിലൂടെ സഞ്ചരിക്കാൻ ഏതൊരാളെയും കൊതിപ്പിക്കുന്ന ദൃശ്യങ്ങളാണെന്നതിൽ സംശയമില്ലെന്ന് ചിത്രങ്ങൾക്ക് താഴെ വന്ന പ്രതികരണങ്ങൾ സൂചിപ്പിക്കുന്നു.
മാർച്ച് രണ്ടാം വാരം പാതയുടെ ഉദ്ഘാടനം നടക്കുമെന്നാണ് പ്രതീക്ഷിക്കുന്നത്. പത്ത് വരി പാതയാണ് ബെംഗളൂരു – മൈസൂരു എക്സ്പ്രസ് വേ. അതിവേഗ പാത ഉദ്ഘാടനം ചെയ്യുന്നതിനൊപ്പം മൈസൂരു – കുശാൽനഗർ നാലുവരി ഹൈവേയുടെ തറക്കല്ലിടൽ ചടങ്ങും പ്രധാനമന്ത്രി നിർവഹിക്കുമെന്ന് മൈസൂരു എംപി പ്രതാപ് സിൻഹ അറിയിച്ചു. 3,500 കോടി രൂപ ചിലവിലാണ് ഹൈവേ നിർമാണം നടക്കുക. ബെംഗളൂരു – മൈസൂരു എക്സ്പ്രസ് വേയുമായി ബന്ധിപ്പിക്കുന്ന കുശാൽനഗർ ഹൈവേ മഡിക്കേരിയിൽ നിന്ന് ബെംഗളൂരുവിലേക്കുള്ള യാത്രാസമയം കുറയ്ക്കുന്നതാണ്.
