ലോകത്തിലെ തന്നെ ഏറ്റവും വലിയ വാഴയെപ്പറ്റി കേട്ടിട്ടുണ്ടോ? ചിലരെങ്കിലും കേട്ടിട്ടുണ്ടാവും. മുസ ഇൻജൻസ് എന്ന ഇനമാണ് ലോകത്തിലെ തന്നെ ഏറ്റവും വലിയ വാഴ. 1989-ൽ ജെഫി ഡാനിയൽസ് എന്ന സസ്യ ശാസ്ത്രജ്ഞനാണ് ലോകത്തിന് ഏറ്റവും വലിയ വാഴയെ പരിചയപ്പെടുത്തിയത്. ഈ വാഴ ധാരാളമായി കണ്ടുവരുന്നത് പാപുവ ന്യൂ ഗ്വിനിയ എന്ന രാജ്യത്താണ്.
രണ്ടാൾ ചുറ്റി പിടിച്ചാൽ എത്തുന്ന തരത്തിലുള്ള ഈ വാഴയിനം, അസാമാന്യ പൊക്കം ഉള്ളതിനാൽ മരമായി വരെ തെറ്റിദ്ധരിച്ചു പോകും. സമുദ്രനിരപ്പിൽ നിന്ന് 1000 മുതൽ 2000 മീറ്റർ വരെ ഉയരത്തിൽ സ്ഥിതി ചെയ്യുന്ന പശ്ചിമ പാപ്പുവയിലെ അഫ്രാക് പർവതനിരകളിലാണ് ഈ ഇനം ആദ്യം കണ്ടെത്തിയത്. ശിലായുഗ കാലം മുതൽക്കെ മുസാ ഇൻജസ് ഭൂമിയിലുണ്ടെന്ന് വിദഗ്ധർ പറയുന്നു.
50 അടിയോളം ഉയരത്തിൽ മുസ ഇൻജൻസ് വളരുമെന്നാണ് കാർഷിക ശാസ്ത്രജ്ഞർ പറയുന്നത്. ഏകദേശം 12 ഇഞ്ചോളം നീളമുള്ള 300-ഓളം പഴങ്ങൾ ഈ വാഴകളുടെ ഒറ്റക്കുലയിൽ ഉണ്ടാകും. ജയന്റ് ഹൈലാൻഡ് എന്നാണ് ഇതിന്റെ വാഴപ്പഴത്തെ വിളിക്കുന്നത്. തൊലിപൊളിക്കുമ്പോൾ ഏത്തപ്പഴം പോലെ മഞ്ഞ നിറമുള്ള മാംസമാണ് പഴങ്ങളിലുള്ളത്. ചെറിയ പുളിയോടുകൂടിയ മധുരമാണ് രുചി.
ഓരോ പഴത്തിനും 25-30 സെന്റീമീറ്റർ നീളമുണ്ട്. ഒരു പടലത്തിന് 60 കിലോഗ്രാം വരെ ഭാരമുണ്ടാകും. ചില അസുഖങ്ങൾക്കുള്ള മരുന്നായും പാപുവ ന്യൂ ഗ്വിനിയിലെ ജനങ്ങൾ ഇത് ഉപയോഗിക്കാറുണ്ട്. വാഴത്തണ്ടും മറ്റും കരകൗശല വസ്തുക്കൾ നിർമ്മിക്കാനും ഉപയോഗിക്കാറുണ്ട്.
Comments