ലക്‌നൗ: ‘സൻസദ് ഖേൽ മഹാകുംഭ്’ ഇന്ത്യയെ കായിക ശക്തിയാക്കാനുള്ള പാതയെന്ന് പ്രധാനമന്ത്രി നരേന്ദ്രമോദി. ഭാരതം ഒരു കായിക ശക്തിയായി മാറണമെങ്കിൽ പുതിയ വഴികൾ സ്വീകരിക്കുകയും പുതിയ സൗകര്യങ്ങൾ സൃഷ്ടിക്കുകയും ചെയ്യണമെന്ന് പ്രധാനമന്ത്രി പറഞ്ഞു. കായികമേഖലയിൽ രാജ്യത്തിന് നല്ല ഭാവിയുണ്ടെന്നും പ്രധാനമന്ത്രി അഭിപ്രായപ്പെട്ടു.
ഗൊരഖ്പൂരിൽ സംഘടിപ്പിച്ച ‘സൻസദ് ഖേൽ മഹാകുംഭ്’ പരിപാടിയുടെ സമാപന ചടങ്ങിനെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. മുഖ്യമന്ത്രി യോഗി ആദിത്യനാഥും എംപി രവി കിഷനും പരിപാടിയിൽ സന്നിഹിതരായിരുന്നു.
2014-മുതൽ കേന്ദ്രസർക്കാർ കായിക ബജറ്റ് മൂന്ന് മടങ്ങ് വർദ്ധിപ്പിച്ചുവെന്ന് പ്രധാനമന്ത്രി ചൂണ്ടിക്കാട്ടി. കായിക വികസനത്തിന് പ്രോത്സാഹനം നൽകുന്ന മുഖ്യമന്ത്രി യോഗി ആദിത്യനാഥിനെ പ്രശംസിച്ച പ്രധാനമന്ത്രി, ഉത്തർപ്രദേശിൽ കായിക മേഖലയിലെ സൗകര്യങ്ങൾ വൻതോതിൽ വികസിപ്പിക്കുന്നുണ്ടെന്നറിയുന്നതിൽ സന്തോഷമുണ്ടെന്ന പ്രധാനമന്ത്രി പറഞ്ഞു.
