ന്യൂഡൽഹി: രാജ്യ തലസ്ഥാനത്ത് ഏഴുവയസ്സുള്ള പെൺകുട്ടിയെ പീഡിപ്പിച്ച കേസിൽ രണ്ടാനമ്മയും മകനും അറസ്റ്റിൽ. ഡൽഹിയിലെ ആർകെ പുരത്ത് മാസങ്ങളോളം യുവതിയും മകനും ചേർന്ന് പ്രായപൂർത്തിയാകാത്ത കുട്ടിയെ മർദിക്കുകയും പീഡിപ്പിക്കുകയും ചെയ്തുവെന്നാണ് പരാതി.
ഡൽഹി സഫ്ദർജംഗ് ആശുപത്രിയിലെ നഴ്സാണ് രണ്ടാനമ്മ. യുവതി പെൺകുട്ടിയെ ദത്തെടുക്കുകയായിരുന്നു. എന്നാൽ സ്നേഹത്തോടെയും കരുതലോടെയും വളർത്തുന്നതിനുപകരം കുട്ടിയെ ചവണകൊണ്ട് തീപൊള്ളൽ ഏൽപ്പിച്ചു. രണ്ടാനമ്മയും യഥാർത്ഥ മകനും മാസങ്ങളോളം പെൺകുട്ടിയെ മർദ്ദിച്ചെന്നും ഡൽഹി പോലീസ് ഉദ്യോഗസ്ഥൻ പറഞ്ഞു.
രണ്ടാനമ്മയ്ക്കും മകനുമെതിരെ ഐപിസി വകുപ്പുകളും ജുവനൈൽ ജസ്റ്റിസ് (കുട്ടികളുടെ സംരക്ഷണവും) നിയമപ്രകാരവും പോലീസ് എഫ്ഐആർ രജിസ്റ്റർ ചെയ്തു. പ്രായപൂർത്തിയാകാത്ത കുട്ടിയുടെ ശരീരത്തിൽ പൊള്ളലേറ്റ പാടുകൾ ഉണ്ടെന്ന് പോലീസ് വ്യക്തമാക്കി.
ഫെബ്രുവരി 10 നാണ് ഈ വിഷയത്തിൽ പരാതി ലഭിച്ചത്. തുടർന്ന് എഫ്ഐആർ ഫയൽ ചെയ്തു. ഫെബ്രുവരി 13 ന് മകനെയും , കഴിഞ്ഞ ദിവസം രണ്ടാനമ്മയെയും അറസ്റ്റ് ചെയ്തെന്ന് പോലീസ് അറിയിച്ചു. സംഭവത്തിൽ യുവതിയുടെ ഭർത്താവിന്റെ പങ്ക് അന്വേഷിച്ചുവരികയാണെന്ന് പോലീസ് പറഞ്ഞു.
