ബ്രഹ്മാണ്ഡ ചിത്രങ്ങളെടുത്ത് ലോകമെമ്പാടുമുള്ള പ്രേക്ഷകരെ ഞെട്ടിച്ച സംവിധായകനാണ് എസ്.എസ് രാജമൗലി. അതേപോലെ തന്നെ അദ്ദേഹത്തിന്റെ അച്ഛൻ വിജയേന്ദ്ര പ്രസാദ് ഇന്ത്യ മുഴുവൻ അറിയപ്പെടുന്ന സംവിധായകനും തിരക്കഥാകൃത്തുമാണ്. ആർആർആർ, ബജ്രംഗി ഭായ്ജാൻ, മണികർണിക, മഗധീര, മെർസൽ തുടങ്ങിയ ഒട്ടേറെ സൂപ്പർഹിറ്റുകളാണ് വിജയേന്ദ്ര പ്രസാദിന്റെ തൂലികയിൽ പിറന്നത്. ഇപ്പോൾ അദ്ദേഹം ആർഎസ്എസിനെ കുറിച്ചുള്ള സിനിമയ്ക്കായി തിരക്കഥ ഒരുക്കുന്ന തിരക്കിലാണ്. ഇത് വലിയ വാർത്തയായിരുന്നു. ഇപ്പോഴിതാ, ഈ ചിത്രത്തെപ്പറ്റി പ്രതികരിച്ചിരിക്കുകയാണ് രാജമൗലി. തിരക്കഥ വായിച്ച് വികാരഭരിതനായി എന്നാണ് സംവിധായകൻ പറയുന്നത്. ഒരു അന്താരാഷ്ട്ര പ്രസിദ്ധീകരണത്തിന് നൽകിയ അഭിമുഖത്തിലാണ് രാജമൗലിയുടെ വെളിപ്പെടുത്തൽ.
‘എനിക്ക് ആർഎസ്എസ് എന്ന സംഘടനയെക്കുറിച്ച് അത്രയ്ക്ക് ആഴത്തിൽ അറിയില്ല. എന്നാൽ, ആർഎസ്എസിനെപ്പറ്റി ധാരാളം കാര്യങ്ങൾ കേട്ടിട്ടുണ്ട്. പക്ഷേ, അത് എങ്ങനെ രൂപപ്പെട്ടു, അതിന്റെ ആശയങ്ങൾ എന്തൊക്കെയാണ്, ആ സംഘടന എങ്ങനെ വികസിച്ചു തുടങ്ങിയ കാര്യങ്ങളൊന്നും എനിക്കറിയില്ല. പക്ഷെ ഞാൻ എന്റെ അച്ഛന്റെ തിരക്കഥ വായിച്ച് അങ്ങേയറ്റം വികാരഭരിതനായി. ആ തിരക്കഥ വായിക്കുന്നതിനിടെ ഞാൻ പലതവണ കരഞ്ഞു’.
‘ഞാൻ വായിച്ച തിരക്കഥ വളരെ വൈകാരികവും മികച്ചതുമാണ്. പക്ഷേ മറ്റുള്ളവർക്ക് അതേക്കുറിച്ച് എന്തു തോന്നുമെന്ന് എനിക്കറിയില്ല. എന്റെ അച്ഛൻ എഴുതിയ തിരക്കഥ ഞാൻ സംവിധാനം ചെയ്യുമോ എന്ന് പലരും ചോദിക്കുന്നുണ്ട്. ഒന്നാമതായി, അത് സാധ്യമാകുമോ എന്ന് എനിക്കറിയില്ല. കാരണം എന്റെ അച്ഛൻ മറ്റാർക്കെങ്കിലും വേണ്ടിയാണോ ഈ തിരക്കഥ എഴുതിയതെന്ന് എനിക്ക് അറിയില്ല. ഈ ചോദ്യത്തിന് എന്റെ പക്കൽ ഇപ്പോൾ കൃത്യമായ ഉത്തരമില്ല. എന്നാൽ, ഈ കഥ സംവിധാനം ചെയ്യാൻ സാധിച്ചാൽ അതൊരു ബഹുമതിയായി ഞാൻ കണക്കാക്കുന്നു’- എന്ന് രാജമൗലി പറഞ്ഞു.
Comments