തുർക്കി-സിറിയ ഭൂകമ്പത്തിൽ ഇതിനോടകം തന്നെ കൊല്ലപ്പെട്ടവരുടെ എണ്ണം 46,000 കഴിഞ്ഞിരിക്കുന്നു. മരണസംഖ്യ ദിനം പ്രതി ഉയർന്നു കൊണ്ടിരിക്കുകയാണ്. ഏകദേശം 2,64,000 കെട്ടിടങ്ങളാണ് ഭൂകമ്പത്തിൽ തകർന്നടിഞ്ഞത്. ഇത് രക്ഷാപ്രവർത്തനത്തിൽ ഏർപ്പെടുന്നവർക്കും വെല്ലുവിളിയായി. ചവിട്ടി നിൽകുന്ന മണ്ണിനടിയിൽ തുടിക്കുന്ന ജീവനുണ്ടോ എന്നറിയാത്ത സാഹചര്യം. എന്നാൽ മുന്നിൽ കാണുന്നതിന്റെയെല്ലാം ജീവൻ രക്ഷിക്കാൻ രക്ഷാപ്രവർത്തകർ സ്വയം മറന്നു പോരാടി. മനുഷ്യരെയും മൃഗങ്ങളെയും രക്ഷാപ്രവർത്തനത്തിലൂടെ തിരികെ കൊണ്ടുവരുന്ന കരളലിയിക്കുന്ന ദൃശ്യങ്ങൾ ദിനംപ്രതി സമൂഹമാദ്ധ്യമത്തിൽ പ്രചരിച്ചുകൊണ്ടിരിക്കുകയാണ്.
കഴിഞ്ഞ ദിവസം മാർഡിൻ ഫയർ വിഭാഗത്തിലെ അലി കക്കാസ് എന്ന ഉദ്യോഗസ്ഥൻ ഒരു പൂച്ചയെ രക്ഷിച്ചിരുന്നു. എന്നാൽ ആ പൂച്ച അലി കക്കാസിന്റെ കൂടെകൂടിയിരിക്കുന്ന വാർത്തകളാണ് സമൂഹ മാദ്ധ്യമങ്ങളിൽ പ്രചരിക്കുന്നത്. യുക്രെയ്ൻ ആഭ്യന്തരമന്ത്രിയുടെ ഉപദേഷ്ടാവ് ആന്റോൺ ഗെരാഷ്ചെങ്കോയാണ് ഈ വിവരം സമൂഹമാദ്ധ്യമത്തിലൂടെ പങ്ക് വച്ചത്. ഫെബ്രുവരി 16-ന് രക്ഷാപ്രവർത്തകനൊപ്പമുള്ള പൂച്ചയുടെ വീഡിയോ അദ്ദേഹം പങ്കുവെച്ചിരുന്നു. റൂബിൾ എന്ന പേരിലുള്ള പൂച്ച അലി കക്കാസിന്റെ തോളിൽ ഇരിക്കുന്നതും മുഖത്തോട് ചേർന്നിരിക്കുന്നതുമാണ് വീഡിയോയിലുള്ളത്.
ദിവസങ്ങൾ പിന്നിടുമ്പോൾ അലി കക്കാസും പൂച്ചയുമൊത്തുള്ള മറ്റൊരു ചിത്രം കൂടി പങ്കു വച്ചിരിക്കുകയാണ് ആന്റോൺ. അലി കക്കാസ് തന്നെ പൂച്ചയെ ഏറ്റെടുത്തിരിക്കുന്നു എന്ന അടിക്കുറിപ്പോടു കൂടിയാണ് ചിത്രം പങ്കുവെച്ചിരിക്കുന്നത്. ചിത്രം പങ്കുവെച്ച് മണിക്കൂറുകൾക്കുള്ളിൽ അഞ്ച് ദശലക്ഷത്തിലധികം ആളുകൾ ഫോട്ടോ കാണുകയും 1.7 ലക്ഷം ലൈക്കുകളും ചിത്രത്തിന് ലഭിച്ചു. നിരവധി ആളുകളാണ് ചിത്രത്തിന് താഴെ കമന്റുകളുമായി എത്തിയിരിക്കുന്നത്.
