ആലപ്പുഴ: എസ്എഫ്‌ഐ ഏരിയ പ്രസിഡന്റായ വിദ്യാർത്ഥിനിക്കെതിരെ ഡിവൈഎഫ്‌ഐയുടെ ആക്രമണം. ആലപ്പുഴ ഹരിപ്പാടുള്ള എസ്എഫ്‌ഐ വനിതാ നേതാവ് ചിന്നുവിന് നേരെയാണ് ആക്രമണമുണ്ടായത്. ഡിവൈഎഫ്‌ഐയുടെ ബ്ലോക്ക് ഭാരവാഹി അമ്പാടി ഉണ്ണി ആക്രമിച്ചുവെന്നാണ് ആരോപണം. ഇയാൾ സിപിഎം ബ്രാഞ്ച് സെക്രട്ടറി കൂടിയാണ്. ചിന്നുവിനെ ബൈക്ക് ഇടിച്ചു വീഴ്‌ത്തിയ ശേഷം മർദ്ദിക്കുകയായിരുന്നു.
കേരള സർവകലാശാല യൂണിയൻ വൈസ് ചെയർപേഴ്‌സൺ കൂടിയാണ് ആക്രമണത്തിന് ഇരയായ ചിന്നു. തലയ്‌ക്കുൾപ്പെടെ പരിക്കേറ്റ യുവതിയെ ഹരിപ്പാട് താലൂക്ക് ആശുപത്രിയിൽ പ്രവേശിപ്പിച്ചു. ആക്രമണ സമയത്ത് അമ്പാടിക്കൊപ്പം മറ്റ് ചില സിപിഎം അനുഭാവികൾ കൂടിയുണ്ടായിരുന്നുവെന്ന് ചിന്നു പറയുന്നു. നേരത്തെ അമ്പാടിക്കെതിരെ ചിന്നു പാർട്ടിയിൽ പരാതി നൽകിയിരുന്നു. ഇതുമായി ബന്ധപ്പെട്ട് പാർട്ടിക്കകത്ത് അന്വേഷണം നടക്കവെയാണ് ആക്രമണം.
