ശ്രീനഗർ: പ്രസവവേദന വന്ന യുവതിക്ക് വാട്സ്ആപ്പിലൂടെ അടിയന്തിര വൈദ്യ സഹായമെത്തിച്ച് ഡോക്ടർമാർ. ജമ്മു കശ്മീരിലെ കേരൻ ഗ്രാമത്തിലാണ് സംഭവം. കനത്ത മഞ്ഞുവീഴ്ചയെ തുടർന്ന് യുവതിയ്ക്ക് ആശുപത്രിയിലേക്ക് പോകുവാൻ സാധിച്ചിരുന്നില്ല.
പ്രസവ വേദന രൂക്ഷമായതോടെ യുവതിയെ തൊട്ടടുത്തുള്ള കേരൻ പ്രാഥമികാരോഗ്യ കേന്ദ്രത്തിൽ പ്രവേശിപ്പിച്ചു. യുവതിയുടെ ആരോഗ്യ നില ഗുരുതരമായതിനാൽ കൂടുതൽ സൗകര്യങ്ങളുള്ള ആശുപത്രിയിലേക്ക് മാറ്റേണ്ടതായി വന്നു. എന്നാൽ കനത്ത മഞ്ഞുവീഴ്ചയെ തുടർന്ന് കുപ്വാര ജില്ലയുടെ മറ്റ് ഭാഗങ്ങളിൽ നിന്ന് കേരൻ പ്രദേശം ഒറ്റപ്പെടുകയായിരുന്നു.
യുവതിക്ക് അടിയന്തിര പരിചരണം ആവശ്യമായി വന്നതിനാൽ പ്രാഥമികാരോഗ്യ കേന്ദ്രത്തിലെ ജീവനക്കാർക്ക് സാങ്കേതിക വിദ്യയുടെ സഹായം തേടേണ്ടതായി വന്നു. വാട്സ്ആപ്പ് കോളിലൂടെ വിദഗ്ദ ഡോക്ടർമാരുടെ നേതൃത്വത്തിൽ യുവതി കുഞ്ഞിന് ജന്മം നൽകി. ആറ് മണിക്കൂറുകൾക്ക് ശേഷമാണ് യുവതി പെൺകുഞ്ഞിന് ജന്മം നൽകിയത്. നിലവിൽ അമ്മയും കുഞ്ഞും നിരീക്ഷണത്തിലാണെന്നും ഇവരുടെ ആരോഗ്യനില തൃപ്തികരമാണെന്നും ആശുപത്രി അധികൃതർ അറിയിച്ചു.
Comments