ന്യൂഡൽഹി : അടുത്ത പാദം തുടങ്ങുന്നതു മുതൽ ജീവനക്കാർ അവരുടെ ഡെസ്കുകൾ പരസ്പരം പങ്കുവയ്ക്കണം എന്ന ഉത്തരവ് പുറത്തിറക്കി ഗൂഗിൾ. ഇന്ത്യയിലുൾപ്പടെ നിരവധി സ്ഥലങ്ങളിലെ ഓഫീസുകൾ അടച്ചുപൂട്ടുവാൻ തീരുമാനിച്ചതായി കമ്പനി അറിയിച്ചിരുന്നു. ഇതിന്റെ പശ്ചാത്തലത്തിലാണ് ഓഫീസ് സ്പേസുകൾ പങ്കിടാൻ കമ്പനി ജീവനക്കാർക്ക് നിർദേശം നൽകിയത്.
ന്യൂയോർക്ക് സിറ്റിയിലെ യുഎസ് ഓഫീസുകളിൽ പ്രവർത്തിക്കുന്ന ജീവനക്കാർക്കാണ് അറിയിപ്പ് ലഭിച്ചിരിക്കുന്നത്. ‘ക്ലൗഡിന്റെ വളർച്ചയിൽ നിക്ഷേപം തുടരുന്നതിന്’ കമ്പനി നടപടികൾ സ്വീകരിക്കുന്നു എന്നാണ് അധികൃതർ പറഞ്ഞത്. പുതിയ ഇരിപ്പിട ക്രമീകരണെം ‘ക്ലൗഡ് ഓഫീസ് എവല്യൂഷൻ’ എന്ന തലക്കെട്ടോടു കൂടിയാണ് അവതരിപ്പിച്ചിരിക്കുന്നത്. കാര്യക്ഷമമായി എല്ലാ ഇടവും ഉപയോഗിക്കുക എന്നതാണ് ലക്ഷ്യമെന്നും കമ്പനി പറഞ്ഞു. റിയൽ എസ്റ്റേറ്റ് കാര്യക്ഷമത വർദ്ധിപ്പിക്കുന്നതിനും വളർച്ചയെ ലക്ഷ്യമിട്ടുകൊണ്ടും യു എസ്സിലെ അഞ്ച് സ്ഥലങ്ങളിലാണ് പുതിയ പദ്ധതി ആവിഷ്കരിച്ചിരിക്കുന്നത്.
ജീവനക്കാർ പരസ്പരം ഒരു ഡെസ്ക് പങ്കിടുന്നത് ഒഴിവാക്കുന്നതിനായി ഒന്നവിടവിട്ട ദിവസങ്ങളിൽ വരാനുള്ള ഒരുക്കങ്ങളാണ് സജ്ജമാക്കിയിരിക്കുന്നത്. അനുവദിക്കാത്ത ദിവസങ്ങളിൽ എത്തുന്ന ജീവനക്കാർ ഓവർഫ്ളോ ഡ്രോപ്പ്-ഇൻ സ്പെയ്സുകളാണ് ഉപയോഗിക്കേണ്ടത്. റിയൽ എസ്റ്റേറ്റ് ഇടപാടുകൾ സംബന്ധിച്ചും കൂടാതെ ചെലവ് ചുരുക്കുകളുടെയും ഭാഗമായാണ് പുതിയ നീക്കം.
