ന്യൂഡൽഹി:മാർച്ച് മാസത്തിൽ ക്ലാസുകൾ ആരംഭിക്കുന്നത് വിലക്കി സിബിഎസ്ഇ. ഏപ്രിൽ ഒന്നിന് മുൻപ് ക്ലാസുകൾ ആരംഭിക്കരുതെന്ന് സ്‌കൂളുകൾക്ക് സിബിഎസ്ഇ നിർദ്ദേശം നൽകി.
സിബിഎസ്ഇ പത്ത്, പന്ത്രണ്ട് ക്ലാസ് വിദ്യാർത്ഥികൾക്ക് ചില സ്‌കൂളുകൾ മാർച്ച് മാസത്തിൽ തന്നെ ക്ലാസുകൾ ആരംഭിച്ചുവെന്ന സൂചന ലഭിച്ചതിന്റെ അടിസ്ഥാനത്തിലാണ് സിബിഎസ്ഇയുടെ മുന്നറിയിപ്പ്.
ചില സ്‌കൂളുകൾ നേരത്തെ തന്നെ ക്ലാസുകൾ ആരംഭിച്ചതായി ശ്രദ്ധയിൽപ്പെട്ടിട്ടുണ്ട്. ഒരു വർഷത്തെ പാഠം ചെറിയ കാലേയലവിൽ തീർക്കുന്നത് കുട്ടികളിൽ ആശങ്ക സൃഷ്ടിക്കും. പാഠഭാഗം വേഗത്തിൽ ഗ്രഹിക്കാൻ കഴിയാത്ത് ഇത് കുട്ടികളെ പ്രതിസന്ധിയിലാക്കുകയും ചെയ്യും- സിബിഎസ്ഇ സെക്രട്ടറി അനുരാഗ് തൃപാഠിയുടെ ഔദ്യോഗിക ഉത്തരവിൽ പറയുന്നു.
ക്ലാസുകൾ നേരത്തെ ആരംഭിക്കുന്നത് കുട്ടികളിലെ പാഠ്യേതരക വിഷയങ്ങൾക്കുള്ള സമയം നഷ്ടപ്പെടുത്തുമെന്നും സിബിഎസ്ഇ നിരീക്ഷിച്ചു. പഠനം പോലെ തന്നെ പ്രധാനപ്പെട്ടതാണ് കുട്ടികളുടെ പാഠ്യേതര പ്രവർത്തനങ്ങളെന്നും അവ നൽകുന്ന മാനസിക -ശാരീരിക ആരോഗ്യം പ്രധാനപ്പെട്ടതാണെന്നും സിബിഎസ്ഇ മാർഗ്ഗനിർദ്ദേശത്തിൽ വ്യക്തമാക്കുന്നു.
