ഭോപ്പാൽ: കുനോ നാഷണൽ പാർക്കിൽ അലഞ്ഞ് തിരിയുന്ന ചീറ്റയുടെ ചിത്രം വൈറലാകുന്നു. വനം വകുപ്പ് ഉദ്യോഗസ്ഥരാണ് ചീറ്റയുടെ ചിത്രങ്ങൾ പകർത്തിയിരിക്കുന്നത്. ആശ എന്ന പെൺ ചീറ്റയ്ക്കോപ്പം തുറന്ന് വിട്ട ഓബൻ എന്ന ആൺ ചീറ്റയാണ് ചിത്രത്തിലുള്ളത്.
മാർച്ച് 11-നാണ് ഒബാനെയും ആശയെയും കുനോ നാഷണൽ പാർക്കിൽ സ്വൈര്യവിഹാരത്തിന് തുറന്ന് വിട്ടത്. ഇരുവരും ദേശീയ ഉദ്യാനത്തിലെ ആവാസവ്യവസ്ഥയോട് ഇണങ്ങിയിട്ടുണ്ടെന്ന് ചീറ്റകളെ സംരക്ഷിക്കുന്ന ഉദ്യോഗസ്ഥർ വ്യക്തമാക്കി.
കഴിഞ്ഞ വർഷം നമീബിയയിൽ നിന്ന് എത്തിച്ച പെൺ ചീറ്റയ്ക്ക് ‘ആശ’ എന്ന പേര് നൽകിയത് പ്രധാനമന്ത്രി നരേന്ദ്ര മോദിയാണ്.
ഇരുപത്തിനാല് മണിക്കുറും ഇവയെ വനം വകുപ്പ് നിരീക്ഷിക്കുന്നുണ്ട്. കേന്ദ്ര പരിസ്ഥിതി മന്ത്രാലയത്തിന്റെ പ്രത്യേക ദൗത്യ സംഘമാണ് കുനോയിലെ ചീറ്റകുടെ പുനരധിവാസത്തിന് നേതൃത്വം നൽകുന്നത്.
പ്രകൃതിയോട് എറ്റവും ഇണങ്ങി ജീവിക്കുന്ന മൃഗങ്ങളാണ് ചീറ്റകൾ. ആഫ്രിക്കയിലെ കനത്ത മഴയിലും തണുപ്പിലും ജീവിക്കുന്ന ഇവയ്ക്ക് കുനോയിലെ കാലാവസ്ഥയുമായി പെട്ടെന്ന് തന്നെ ഇണങ്ങാൻ സാധിക്കുമെന്ന് നാഷണൽ പാർക്ക് അധികൃതർ പറഞ്ഞു.
