ശാരദാ പട്ടാഭിഷേകം.!!! ശാരദാ ദേവി കാശ്മീരിൽ തിരിച്ചെത്തുമ്പോൾ

ഇന്നലെ കേരളത്തിൽ അധികമാരും തന്നെ ശ്രദ്ധിക്കപ്പെടാതെ പോയൊരു വാർത്തയുണ്ട് !
കശ്മീരിൽ വീണ്ടും ശാരദാദേവിയുടെ ദർശനത്തിനായി വേദിയൊരുങ്ങിയ വാർത്ത!
വർഷങ്ങൾക്കു ശേഷം ശാരദാദേവിയുടെ പഞ്ചലോഹ വിഗ്രഹം കാശ്മീരിൽ തിരിച്ചെത്തിയ വാർത്ത !
ആരാണ് ശാരദ ? ദേവി സരസ്വതി തന്നെയാണ്!
ശ്രീ സരസ്വതി! ക്രിയാശക്തി സ്വരൂപിണി!
അറിവിന്റെ പ്രവാഹമായി സദാ ഒഴുകുന്നവൾ.
അതു വഴി ഒരുവനിലെ വാക് വിലാസങ്ങൾക്ക് സ്തന്യമൂട്ടുന്നവൾ !
സകല കലകൾക്കും അധിനാഥയായവൾ !
സകല ക്രിയാ ശക്തിയേയും വരമായി നൽകിയവൾ – വരദ ! – ശാരദ !
വിദ്യാ വിലാസ സമ്പൂർത്തി നേടി ദ്വിഗ്വിജയിയായ ശ്രീശങ്കരൻ ആ തിരുസന്നിധിയിൽ വെച്ച് സർവ്വജ്ഞപീഠമേറിയത് ഇക്കാരണങ്ങൾ കൊണ്ടു തന്നെയാകണം !

ശാരദാ പീഠം ! ശാരദയുടെ ഇരിപ്പിടം !
സർവകലാശാലയായിരുന്നു !
അനന്തമായി നീണ്ട ശിഷ്യ പരമ്പരയ്‌ക്ക് ഉള്ളം നിറയുമാറ്
വിദ്യാ ദാനം നൽകിയിടമായിരുന്നു. !
എല്ലാ തരം ശാസ്ത്ര വിഷയങ്ങളും പൂർണ്ണരൂപത്തിലടങ്ങുന്ന
വിശിഷ്ടങ്ങളായ ഗ്രന്ഥസമ്പത്തിനുടമയായിരുന്നു !
പതിനെട്ട് മഹാ ശക്തി പീoങ്ങളിലൊന്നായിരുന്നു !
സതീ ദേവിയുടെ വലംകൈ പതിച്ചിടമായിരുന്നു!
കശ്മീരത്തിനഭയ കേന്ദ്രമായിരുന്നു !

സോമനാഥം കണക്ക്, മാർത്താണ്ഡം കണക്ക് ,പുകഴ് പെറ്റ ക്ഷേത്രമായിരുന്നു.
ശംഖ മണിനാദങ്ങൾ കൊണ്ടവിടം സദാ മുഖരിതമായിരുന്നു.
പൂജാ പാഠങ്ങളും അഭിഷേക നൈവേദ്യങ്ങളും സമയാസമയത്തമ്മയെ തൃപ്തയാക്കിയിരുന്നു.
കശ്മീരം പൂർണ്ണമായും കശ്മീര പുരവാസിനിയുടെതായിരുന്നു. ശാരദയുടെതായിരുന്നു.

സിക്കന്ദർ ബുട്ട്ഷിക്കൻ ! കശ്മീരിലെ ക്ഷേത്രങ്ങൾ തച്ചുടച്ചവൻ !
അയാൾ ഗ്രന്ഥപ്പുരകൾക്ക് തീയിട്ടു , ജസിയ അടിച്ചേൽപ്പിച്ചു …
ശാരദാ പീഠത്തൊടൊപ്പം,ശാരദാ പ്രസാദങ്ങളെയെല്ലാം തന്നെ ,നൃത്ത , നൃത്യ , നാട്യ , സംഗീത, വാദ്യഘോഷ ങ്ങളെയെല്ലാം നിരോധിച്ചു …
സ്വർഗ്ഗഭൂമിയെ നരക ഭൂമിയാക്കി !

തുടർന്ന്, ഏറെ താമസിയാതെ ശാരദാ പീഠം മഹാരാജ ഗുലാബ് സിംഗ് പുനരുദ്ധരിച്ചു …
പക്ഷെ അദ്ദേഹത്തിന് അതിന്റെ പേരിൽ ബുദ്ധിമുട്ടുകളുണ്ടായതിനാലാകാം
ആ പുനരുദ്ധാരണം പോലും ഭാഗികമായിപ്പോയത്!
അതോ മറ്റു വല്ല കാരണവുമാണോ ? അറിയില്ല ..

ശേഷം, 1947 ൽ വെട്ടിമുറിച്ചു മാറ്റി രണ്ടു കഷ്ണമാക്കിയപ്പൊൾ
ശാരദാ പീഠം മറു കഷ്ണത്തിലേക്ക് ചേർക്കപ്പെട്ടു..
അധിദേവത അകന്നതോടെ കശ്മീരി പണ്ഡിറ്റുകളനാഥരായി !
നാടും വീടുമുപേക്ഷിച്ച് പലായനമായിരുന്നു അവരുടെ വിധി!

അതോടെ ശാരദാപീഠത്തിൽ പൂജാപാഠങ്ങൾ പൂർണ്ണമായുമൊഴിഞ്ഞു !
ദിഗ്വജയിയായി പുഞ്ചിരി തൂകിയിരുന്ന ശാരദാദേവി അവിടം വിട്ടൊഴിഞ്ഞു പോയി!

കശ്മീരിലുണ്ടാകുന്ന രക്തച്ചൊരിച്ചിലുകൾ ദേവിയുടെ തിരോധാനം മൂലമെന്ന് വിശ്വസിക്കുന്നകശ്മീരി പണ്ഡിറ്റുകളോടൊപ്പം മറ്റു പലരുമുണ്ട് ! അങ്ങനെയാണ് ദേവിയുടെ പുനരാഗമനത്തിനായി സങ്കല്പങ്ങളുണ്ടായിത്തുടങ്ങിയത്!
ഒടുവിൽ ദേവി ഭക്തരുടെ വിളി കേട്ടു ! ഇന്നലെ , ശാരദാ ദേവി വീണ്ടും കാശ്മീരിലെത്തിയിരിക്കയാണ്!
ഭാരതത്തിലെ പ്രധാനപ്പെട്ട നഗരങ്ങളെല്ലാം താണ്ടിയാണ് ശൃംഗേരി പീoത്തിൽ നിന്നും 3000 ത്തോളം കിലോമീറ്ററുകൾ താണ്ടിയാണ് ദേവി തിരിച്ചെത്തിയത് !

ലോകത്തുള്ള സകല വിദ്യാ സ്വരൂപങ്ങൾക്കും അധിദേവതയായ
ശാരദാദേവിയുടെ ക്ഷേത്രം ജനങ്ങൾക്കായ് അമിത് ഷാ തുറന്നു കൊടുത്തിരിക്കുകയാണ് !
അന്തിത്തിരിയില്ലാതെ ഇരുളഞ്ഞ മൂലസ്ഥാനത്ത് ഇന്നലെ മുതൽ വീണ്ടും വിളക്കുകൾ തെളിഞ്ഞിരിക്കയാണ് !
ഇനിയവിടെ ശംഖനാദവും , മണിനാദങ്ങളും ,പൂജകളും , അഭിഷേകനൈവേദ്യങ്ങളുമുണ്ടാകും !
അനാഥയായിരുന്നവൾ സനാഥയായി സർവ്വാഭീഷ്ടദായിനിയായി വരദയായി തിരിച്ചെഴുന്നള്ളിയിരിക്കയാണ് !
അങ്ങനെ, ഗതി കെട്ട് തല താഴ്‌ത്തിക്കഴിഞ്ഞ ഒരുജനത പതുക്കെ തങ്ങളുടെ സത്വബോധം വീണ്ടെടുക്കുകയാണ് !

താഴ്ന്ന് താഴ്ന്ന് ഭൂമിയോളവും ഒടുവിലിപ്പോൾ ഭൂമിക്കടിയിലേക്കും താഴ്ന്ന് പോയ ഒരു ജനത പതിയെ തങ്ങളുടെ ശിരസ്സുയർത്തി നിവർന്നു നിൽക്കാനാരംഭിക്കുകയാണ് !
ആശ്വാസത്തിന്റെ ഒരു ചെറു കൈത്തിരി ബാക്കിയുണ്ടായിരുന്നതിന് ശോഭയേറി വരികയാണ് !

നശിച്ചവയെല്ലാം ഭൂമിയിൽ പുനർജനിക്കുമെന്ന സത്യം വീണ്ടും മുമ്പിൽ തെളിഞ്ഞിരിക്കയാണ് !
ദേവതകളെ ഉപേക്ഷിച്ചും നെഞ്ചോടു ചേർത്തും പലായനം ചെയ്ത ഒരു ജനത തങ്ങളുടെ ദേവതമാരെ തിരികെ കൊണ്ടുവരികയാണ് !
ഭാരതത്തിന്റെ വിശ്വഗുരുസ്ഥാനത്തിനായി ദേവതമാർ സ്വസ്ഥാനത്ത് മടങ്ങിയെത്തിയെ മതിയാകു !
അതിന്റെ ഭാഗമായി, വിശ്വവിദ്യയുടെ , വിശ്വകലകളുടെ , വിശ്വപ്രേമത്തിന്റെ , സ്തന്യം വരുംതലമുറക്ക് വേണ്ടിയൊഴുക്കാൻ ശാരദ സ്വസ്ഥാനത്ത് മടങ്ങിയെത്തിയിരിക്കയാണ് !

നമസ്തേ ശാരദേ ദേവീ
കാശ്മീരപുര വാസിനി
ത്വാമഹം പ്രാർത്ഥയേ നിത്യം
വിദ്യാദാനം ച ദേഹി മേ

കൃഷ്ണപ്രിയ