മലയാള സിനിമാ ലോകത്തിന് ഇന്ന് കറുത്ത ദിനമാണ്. മലയാളികളെ ചിരിപ്പിച്ച പ്രിയ ഇന്നച്ചന് അന്ത്യാഞ്ജലി അർപ്പിച്ച് ആയിരങ്ങളാണ് ഇരിങ്ങാലക്കുടയിലേക്ക് ഓടിയെത്തുന്നത്. സമൂഹമാദ്ധ്യമങ്ങളിലൂടെയും ആദാരാഞജലി അർപ്പിക്കുന്നവരുമുണ്ട്. അത്തരത്തിൽ ഇന്നസെന്റുമായുള്ള ഓർമ്മകൾ പങ്കുവെയ്‌ക്കുന്ന ഹൃദയഭേദകമായ പോസ്റ്റാണ് സംവിധായകൻ ആലപ്പി അഷ്‌റഫ് പങ്കുവെച്ചിരിക്കുന്നത്.
ചേതനയറ്റ ഇന്നസെന്റിന്റെ ശരീരത്തിൽ മേക്കപ്പ് ചെയ്യുന്ന ഫോട്ടോയ്‌ക്കൊപ്പമാണ് അദ്ദേഹം കുറിപ്പ് പങ്കുവെച്ചിരിക്കുന്നത്. ‘ ഒരിക്കൽ കൂടി , ഇനിയൊരു മേക്കപ്പ് ഇടൽ ഉണ്ടാവില്ല. എന്നാലും അരങ്ങ് തകർത്ത അഭിനയ മികവ് എന്നും നിലനിൽക്കും’ -എന്നാണ് ആലപ്പി അഷ്‌റഫ് ഫേസ്ബുക്കിൽ കുറിച്ചത്.
രാവിലെ എട്ട് മണി മുതൽ കടവന്ത്ര ഇൻഡോർ സ്‌റ്റേഡിയത്തിൽ നടന്ന പൊതുദർശനത്തിന് ശേഷം മൃതദേഹം സ്വദേശമായ ഇരിങ്ങാലക്കുടയിലേക്ക് എത്തിച്ചു. ഇവിടെത്തെ പൊതുദർശനത്തിന് ശേഷം ഭൗതിക ദേഹം വീട്ടിലേക്ക് കൊണ്ടുപോകും. ഇരിങ്ങാലക്കുട സെന്റ്..തോമസ് കത്തീഡ്രലിൽ ചൊവ്വാഴ്ച രാവിലെ പത്തിനാണ് സംസ്‌കാരം.
