പുകവലി ആരോഗ്യത്തിന് ഹാനികരമാണെന്നറിഞ്ഞാലും നമ്മുടെ സമൂഹത്തിൽ സ്ത്രീ പുരുഷഭേദമന്യേ നിരവധിയാളുകൾ പുകവലി ശീലമാക്കിയവരാണ്. വല്ലപ്പോഴും മാത്രം വലിക്കുന്നവരും ദിവസേന ഉപയോഗിക്കുന്നവരും പ്രതിദിനം ഒരു സിഗരറ്റ് പാക്കറ്റ് മുഴുവൻ തീർക്കുന്നവരും ഇക്കൂട്ടത്തിലുണ്ട്. പുകവലി ശീലമാക്കുന്നവർ നേരിടേണ്ടി വരുന്ന ആരോഗ്യപ്രശ്നങ്ങൾ എന്താണെന്ന് എല്ലാവർക്കുമറിയാം. അതിലൊന്നാണ് ചുണ്ടിലെ കറുപ്പ് നിറം..
പുകവലി മൂലം ചുണ്ട് കറുത്ത് പോയെങ്കിൽ അത് മാറ്റാനും ചില പോംവഴികളുണ്ടെന്നാണ് ആരോഗ്യവിദഗ്ധർ പറയുന്നത്. അവയെന്തെല്ലാമാണെന്ന് നോക്കാം.
അലോവേര: അലോയിൻ എന്ന ഘടകമടങ്ങിയിട്ടുള്ള ഒന്നാണ് അലോവേര അഥവാ കറ്റാർവാഴ. തൊലിയ്ക്ക് വരുന്ന നിറവ്യത്യാസം മാറ്റിയെടുക്കാൻ ഇത് വളരെയധികം സഹായിക്കും. അതിനാൽ നല്ല ഫ്രഷായി തയ്യാറാക്കിയ അലോവേര ജെൽ നിരന്തരം ചുണ്ടിൽ പുരട്ടിയിടുന്നത് ചുണ്ടുകളുടെ സ്വാഭാവിക നിറം കൈവരാൻ സഹായിക്കുന്നതാണ്.
ആൽമണ്ട് ഓയിൽ: ചർമ്മത്തെ പുനരുജ്ജീവിപ്പിക്കാൻ ഏറ്റവുമധികം സഹായിക്കുന്ന ഒന്നാണ് ബദാം ഓയിൽ. ചുണ്ടുകൾ വരണ്ടുപോകുന്നത് തടയാനും ഇത് സഹായിക്കും. ദിവസവും രാത്രി കിടക്കുന്നതിന് മുമ്പ് ബദാം ഓയിൽ ചുണ്ടിൽ പുരട്ടി ഇടാവുന്നതാണ്.
ആയുർവേദിക് ലിപ് മാസ്ക്: ഇത് തയ്യാറാക്കുന്നതിനായി പനിനീർപൂവിന്റെ ഇതളുകൾ 15 മിനിറ്റ് നേരം പാലിൽ കുതിർത്തിയിടുക. അതിലേക്ക് തേൻ ചേർത്തിളക്കുക. ശേഷം ഇത് നല്ലപോലെ മിക്സ് ചെയ്ത് പേസ്റ്റ് രൂപത്തിലാക്കി ചുണ്ടിൽ പുരട്ടാം. 10 മിനിറ്റിന് ശേഷം കഴുകി കളയാവുന്നതാണ്. ദിവസവും ഇത് ചെയ്താൽ നിങ്ങളുടെ ചുണ്ടുകൾ മിനുസമുള്ളതാകുകയും സ്വാഭാവിക നിറം കൈവരികയും ചെയ്യും.
Comments