ന്യൂഡൽഹി: ആൻഡ്രോയിഡ്, ആപ്പിൾ ഉപകരണങ്ങളിൽ നിന്ന് ഗൂഗിൾ സ്ട്രീറ്റ് വ്യൂ ആപ്പ് നീക്കം ചെയ്തു. ലോകത്തുടനീളമുള്ള സ്ഥലങ്ങളുടെ 360 ഡിഗ്രി ചിത്രങ്ങൾ കാണുന്നതിനും അപ്ലോഡ് ചെയ്യുന്നതിനും സഹായിക്കുന്ന ആപ്ലിക്കേഷനായിരുന്നു സ്ട്രീറ്റ് വ്യൂ ആപ്പ്. മറ്റൊരു ആപ്പിലും ലഭ്യമല്ലാത്ത ഒട്ടനവധി സവിശേഷതകളാണ് സ്ട്രീറ്റ് വ്യൂ ആപ്പിലുണ്ടായിരുന്നത്.
സ്ട്രീറ്റ് വ്യൂ ആപ്പ് നേരിട്ട് തന്നെ ലോകത്തെമ്പാടുമുള്ള പ്രധാന സ്ഥലങ്ങളുടെയെല്ലാം ചിത്രങ്ങൾ പകർത്തി ഗൂഗിൾ മാപ്പിൽ നൽകിയിരുന്നു. ഇതിനായി പ്രത്യേകം വാഹനങ്ങളും വ്യക്തികളും പ്രവർത്തിച്ചിരുന്നു. ഗൂഗിൾ സ്ട്രീറ്റ് വ്യൂവിന് നേരിട്ട് എത്തിച്ചേരാൻ സാധിക്കാത്ത സ്ഥലങ്ങളുടെ 360 ഡിഗ്രി ചിത്രങ്ങൾ ഉപഭോക്താക്കളിൽ നിന്ന് ശേഖരിക്കാൻ സ്ട്രീറ്റ് വ്യൂ ആപ്പിലൂടെ സാധിക്കും.
സ്ട്രീറ്റ് വ്യൂ ആപ്പ് നീക്കം ചെയ്തതോടെ ഗൂഗിൾ മാപ്പിലേക്ക് 360 ഡിഗ്രി ചിത്രങ്ങൾ അപ് ലോഡ് ചെയ്യുന്നതിനുള്ള എളുപ്പവഴി നഷ്ടമായിരിക്കുകയാണ്. ഇനി സ്ട്രീറ്റ് വ്യൂ സ്റ്റുഡിയോ വഴി 360 ഡിഗ്രി വീഡിയോകൾ മാത്രമാണ് അപ്ലോഡ് ചെയ്യാൻ സാധിക്കുക. ആപ്പ് നീക്കം ചെയ്യുന്നതിനുള്ള കാരണം എന്താണെന്ന് ഇതുവരെ വ്യക്തമായിട്ടില്ല. എന്നാൽ ഇതുവരെ ലഭ്യമായിരുന്ന 360 ഡിഗ്രി ചിത്രങ്ങൾ തുടർന്ന് കാണുന്നതിന് തടസ്സമില്ലെന്നാണ് പുറത്ത് വരുന്ന വിവരം.
Comments