വിദ്യാർത്ഥികളുമായി ലൈംഗിക ബന്ധം; ആറ് അദ്ധ്യാപികമാർക്കെതിരെ ബലാത്സംഗക്കേസ്

ന്യൂയോർക്ക്: വിദ്യാർത്ഥികളുമായി ലൈംഗികമായി ബന്ധം പുലർത്തിയതിന്  ബലാത്സംഗക്കുറ്റം ചുമത്തപ്പെട്ട അദ്ധ്യാപികമാർ അറസ്റ്റിൽ. യുഎസിലാണ് സംഭവം. രണ്ട് ദിവസത്തിനിടെയാണ് വ്യത്യസ്ത കേസുകളിലായി ആറ് അദ്ധ്യാപികമാർ പിടിയിലായത്.

വുഡ്‌ലോൺ എലമെന്ററി സ്‌കൂളിൽ അദ്ധ്യാപികയായി ജോലി ചെയ്തിരുന്ന എല്ലെൻ ഷെൽ എന്ന 38-കാരിയാണ് അറസ്റ്റിലായവരിൽ ഒരാൾ. കഴിഞ്ഞ വർഷം ജൂലൈ, ഓഗസ്റ്റ് മാസങ്ങളിലായി 16 വയസുള്ള ആൺകുട്ടികളുമായി മൂന്ന് തവണ ലൈംഗികബന്ധത്തിൽ ഏർപ്പെട്ടുവെന്നാണ് ഷെല്ലിനെതിരായ കുറ്റം. കൗമാരക്കാരായ വിദ്യാർത്ഥികളുമായി ലൈംഗിക ബന്ധം പുലർത്തിയതിനാണ് അർക്കൻസാസ് സ്വദേശിയായ 32കാരി ഹെതർ ഹെയറിനെ പിടികൂടിയത്. 15കാരനുമായി ബന്ധം സ്ഥാപിച്ചതിനെ തുടർന്ന് ഒക്ലഹോമയിൽ നിന്നുള്ള എമിനി എന്ന 26 കാരിയും പിടിയിലായി. സമാന രീതിയിലാണ് മറ്റ് അദ്ധ്യാപികമാരും അറസ്റ്റിലായത്.

ലൈംഗിക ബന്ധത്തിലേർപ്പെടുന്നതിന് നിശ്ചിത പ്രായം പൂർത്തിയാക്കണമെന്നാണ് നിയമം. അമേരിക്കയെ സംബന്ധിച്ചിടത്തോളം യുഎസിലെ വിവിധ സംസ്ഥാനങ്ങളിൽ വ്യത്യസ്ത പ്രായപരിധിയാണ് നിശ്ചയിച്ചിട്ടുള്ളത്. ചില സംസ്ഥാനങ്ങളിൽ 15 വയസിന് മുകളിലുള്ളവർക്ക് ലൈംഗികബന്ധത്തിൽ ഏർപ്പെടാം. എന്നാൽ ഒറിഗോൺ പോലുള്ള സംസ്ഥാനങ്ങളിൽ ലൈംഗിക ബന്ധത്തിന് അനുമതി നൽകുന്ന കുറഞ്ഞ പ്രായം 18 ആണ്. ഈ നിയമം ലംഘിച്ച് പ്രസ്തുത വയസിന് താഴെയുള്ളവരുമായി മുതിർന്നവർ ലൈംഗിക ബന്ധത്തിൽ ഏർപ്പെട്ടാൽ ബലാത്സംഗമായാണ് കണക്കാക്കുക.