തിരുവനന്തപുരം : വന്ദേഭാരത് ട്രെയിനിന്റെ ടിക്കറ്റ് നിരക്കില് അന്തിമ തീരുമാനത്തിന് ശേഷം പ്രഖ്യാപനം ഉടന്. ചെയര് കാറിന് തിരുവനന്തപുരം മുതല് കണ്ണൂര് വരെ 900 രൂപയും എക്സിക്യൂട്ടീവ് ചെയര് കാറിന് 2,000 രൂപയുമായിരിക്കും നിരക്കെന്നാണ് സൂചന.
ട്രയല് റണ് വിജയകരമായി പൂര്ത്തീകരിച്ച പശ്ചാത്തലത്തില് റൂട്ട് കേന്ദ്രീകരിച്ച് റെയില്വേ ബോര്ഡ് അന്തിമ തീരുമാനം ഉടന് എടുക്കും. നിലവിലെ സാഹചര്യത്തില് തിരുവനന്തപുരത്ത് നിന്നും കണ്ണൂര് വരെയാകും സര്വീസ് നടക്കുക.ആദ്യ ഘട്ടത്തില് സര്വീസുകള് കോഴിക്കോട് വരെ ഉണ്ടാകാമെന്ന അഭ്യൂഹങ്ങള് പ്രചരിച്ചിരുന്നെങ്കിലും റെയില്വേ വൃത്തങ്ങള് ഇത് തള്ളിയിട്ടുണ്ട്. സമയക്രമത്തിന്റെ കാര്യത്തിലും അന്തിമ തീരുമാനം ഉടന് ഉണ്ടാകും.
ഇന്നലെയാണ് കേരളത്തിന് വിഷുക്കൈനീട്ടമായി ലഭിച്ച വന്ദേ ഭാരത് എക്സ്പ്രസിന്റെ ട്രയല് റണ് പൂര്ത്തിയായത്. തിരുവനന്തപുരം മുതല് കണ്ണൂര് വരെയാണ് പരീക്ഷണ ഓട്ടം നടത്തിയത്. തിരുവനന്തപുരത്ത് നിന്ന് പുലര്ച്ചെ 5.10-ഓടെയാണ് ട്രെയിന് പുറപ്പെട്ടത്. ഉച്ചയ്ക്ക് 12.20-ഓടെയാണ് കണ്ണൂര് റെയില്വേ സ്റ്റേഷനില് വന്ദേഭാരത് എത്തിയത്. ഈ മാസം 25-ന് പ്രധാനമന്ത്രി നരേന്ദ്രമോദി ഫ്ളാഗ് ഓഫ് ചെയ്യുന്നതോടെ വന്ദേഭാരത് ട്രെയിന് കേരളത്തിലും ഓടി തുടങ്ങും.
