കൊല്ലം: തിരയിൽപ്പെട്ട് ഏഴ് വയസുകാരിയ്ക്ക് ദാരുണാന്ത്യം. കൊല്ലം നടുവില്ലക്കര സ്വദേശി പരേതനായ ജിസന്റെയും റീനയുടെയും മകൾ ജോഷ്ന ജിസനാണ് മരിച്ചത്. കൊല്ലം ബീച്ചിനും പോർട്ടിനുമിടയിൽ വെച്ചായിരുന്നു ഏഅപകടം സംഭവിച്ചത്.
പുല്ലിച്ചിറ സ്വദേശിയായ പ്രശാന്തിന്റെയും ഇദ്ദേഹത്തിന്റെ രണ്ട് മക്കൾക്കുമൊപ്പമെത്തിയതായിരുന്നു ജോഷ്നയും സഹോദരൻ ജോയലും. കുട്ടികളെ ബീച്ചിന് സമീപം ഇറക്കിയ ശേഷം പ്രശാന്ത് വാഹനം പാർക്ക് ചെയ്യാൻ പോയതിന് പിന്നാലെയായിരുന്നു അപകടം. തീരത്തേക്കിറങ്ങിയ കുട്ടികൾ ശക്തമായ തിരയിൽ അകപ്പെടുകയായിരുന്നു. നാല് പേരും തിരയിൽപ്പെട്ടു. മൂന്ന് പേരെ രക്ഷിക്കാൻ കഴിഞ്ഞെങ്കിലും ജോഷ്ന തിരയിൽ അകപ്പെടുകയായിരുന്നു.
കുട്ടികളുടെ ബഹളം കേട്ട് സമീപവാസികളും ലൈഫ് ഗാർഡുകളും ചേർന്ന് നടത്തിയ തിരച്ചിലിലാണ് മൃതദേഹം കണ്ടെത്തിയത്. സംഭവത്തിൽ പോലീസ് കേസെടുത്തു. മയ്യനാട് കെപിഎം സ്കൂളിലെ വിദ്യാർത്ഥിയാണ് ജോഷ്ന.
