എല്ലാ കായികവിനോദത്തിനും സ്‌പോർട്‌സ് വസ്ത്രങ്ങൾ നിർബന്ധമാണ്. എന്നാൽ പതിവ് രീതികളിൽ നിന്ന് വ്യത്യസ്തമായി സാരി ധരിച്ച് മാരത്തണിൽ പങ്കെടുത്ത് താരമായിരിക്കുകയാണ് ഇന്ത്യൻ യുവതി. യുകെയിലെ മാഞ്ചസ്റ്ററിൽ നടന്ന മത്സരത്തിലാണ് ഒഡീഷ സ്വദേശിനിയായ യുവതി സാരി ധരിച്ച് കളത്തിലിറങ്ങിയത്. നാല് മണിക്കൂർ അമ്പത് മിനിറ്റ് സമയമെടുത്ത് 42.5 കിലോമീറ്റർ ദൂരമാണ് 41-കാരിയായ മധുസ്മിത ജീന ദാസ് സാരിയുടുത്ത് മാരത്തണിൽ പങ്കെടുത്തത്.
സാരിയിൽ അനായാസമായാണ് യുവതി മാരത്തണിൽ പങ്കെടുത്തത്. മാഞ്ചസ്റ്ററിലെ ഹൈസ്‌കൂൾ അദ്ധ്യാപകയും നോർത്ത് വെസ്റ്റ് ഇംഗ്ലണ്ട് കമ്മ്യൂണിറ്റിയിലെ അംഗവുമാണ് മധുസ്മിത ജീന ദാസ്. മാരത്തണിൽ ഓടുന്ന മധുസ്മിതയ്‌ക്ക് പ്രോത്സാഹനം നൽകുന്ന ബന്ധുക്കളെയും സുഹൃത്തുക്കളെയും വീഡിയോയിൽ ദൃശ്യമാണ്.
മാഞ്ചസ്റ്ററിൽ താമസമാക്കിയ ഇന്ത്യൻ വനിത മധുസ്മിത സമ്പൽപ്പൂരി സാരി ധരിച്ചാണ് പങ്കെടുത്തത്. ഇന്ത്യൻ പാരമ്പര്യം ഉയർത്തിപിടിച്ചാണ് യുവതി ഇന്ത്യൻ വസ്ത്രം ധരിച്ച് മാരത്തണിൽ പങ്കെടുത്തത്. -എന്ന അടിക്കുറിപ്പോട് കൂടിയാണ് സമൂഹമാദ്ധ്യമങ്ങളിൽ വീഡിയോ പങ്കുവെച്ചിരിക്കുന്നത്.
എഫ്‌ഐഎസ്‌ഐയുകെ-യുടെ ഒദ്യോഗിക ട്വിറ്റർ പേജിലും മധുസ്മിത മാരത്തണിൽ പങ്കെടുക്കുന്നതിന്റെ ദൃശ്യങ്ങൾ പങ്കുവെച്ചിട്ടുണ്ട്. വീഡിയോ വൈറലായതോടെ നിരവധി പേരാണ് യുവതിയെ പ്രശംസിച്ച് രംഗത്തെത്തിയത്.
