ഈയടുത്ത് ജനഹൃദയങ്ങൾ കീഴടക്കിയ ചിത്രമായിരുന്നു കള്ളനും ഭഗവതിയും. ഒരു ചെറിയ ഇടവേളയ്‌ക്ക് ശേഷം ഈസ്റ്റ് കോസ്റ്റ് വിജയൻ സംവിധാനം ചെയ്ത് വിഷ്ണു ഉണ്ണിക്കൃഷ്ണൻ നായക കഥാപാത്രത്തെ അവതരിപ്പിച്ച ചിത്രമായിരുന്നു ഇത്. സിനിമയിൽ ഭഗവതിയായി പ്രത്യക്ഷപ്പെട്ടത് ബംഗാളി നടി മോക്ഷയാണ്. ഐശ്വര്യം നിറഞ്ഞ, മലയാളിത്തം തുളുമ്പുന്ന സൗന്ദര്യം കൊണ്ടും വശ്യമനോഹരമായ ചിരിയാലും പ്രേക്ഷകർക്ക് ഏറെ പ്രിയങ്കരിയായി മാറിയ താരമാണ് മോക്ഷ.
ഇപ്പോഴിതാ നടൻ ഉണ്ണി മുകുന്ദനെ നേരിൽ കണ്ടതിന്റെ സന്തോഷം സമൂഹമാദ്ധ്യമങ്ങളിലൂടെ പങ്കുവച്ചിരിക്കുകയാണ് നടി. അപ്രതീക്ഷിതമായി അയ്യപ്പസ്വാമിയെ കണ്ടുവെന്നും ഈ കൂടിക്കാഴ്ച ഒരു ആരാധക നിമിഷം പോലെയാണെന്നും മോക്ഷ പങ്കുവച്ചിരിക്കുന്ന പോസ്റ്റിൽ കുറിച്ചു. ഈസ്റ്റ് കോസ്റ്റ് വിജയനും ഇവർക്കൊപ്പമുണ്ടായിരുന്നു. ഉണ്ണി മുകുന്ദനോടൊപ്പമുള്ള ചിത്രങ്ങളും നടി പങ്കുവച്ചിട്ടുണ്ട്. പോസ്റ്റിന് താഴെ നിരവധിപ്പേരാണ് കമന്റുകൾ രേഖപ്പെടുത്തിയിരിക്കുന്നത്.
മുൻപ് താൻ അവസാനമായി കണ്ട മലയാള ചലച്ചിത്രം മാളികപ്പുറമാണ്. ചിത്രം ഏറെ ഇഷ്ടമായിയെന്നും മോക്ഷ പറഞ്ഞിരുന്നു. കുടുംബത്തോടൊപ്പം രണ്ട് തവണ സിനിമ കണ്ടു കഴിഞ്ഞു. മാളികപ്പുറത്തിൽ കല്ലുവായി വേഷമിട്ട ദേവനന്ദയുടെ പ്രകടനം മികച്ചതായിരുന്നു. ഉണ്ണി മുകുന്ദന്റെ അഭിനയം കണ്ട് അത്ഭുതപെട്ടുപോയി. സെക്കന്റ് ഹാഫിൽ ഉണ്ണിയുടെ എൻട്രി ഞെട്ടിച്ചുവെന്നുമാണ് മോക്ഷ പറഞ്ഞത്.
