കാത്തിരിപ്പിന് വിരാമം കുറിച്ച് ജനപ്രിയ നായകൻ ദിലീപിന്റെ ഏറ്റവും പുതിയ ചിത്രമായ ബാന്ദ്രയുടെ ഒഫിഷ്യൽ ടീസർ പുറത്ത്. ദിലീപ് തന്നെയാണ് തന്റെ സമൂഹമാദ്ധ്യമങ്ങളിലൂടെ ഇന്ന് വൈകുന്നേരം 6 മണിക്ക് ടീസർ പുറത്തുവിട്ടത്. ഉണ്ണി മുകുന്ദൻ, ടൊവീനോ തോമസ് ഉൾപ്പടെ നിരവധി താരങ്ങൾ ടീസർ പങ്കുവെച്ചു. ജനപ്രിയ നായകന്റെ വമ്പൻ തിരിച്ചുവരവ് ആഘോഷിക്കുകയാണ് ആരാധകർ. മലയാള സിനിമയിലേക്ക് വീണ്ടും ഒരു മാസ്സ് ആക്ഷൻ പടം എന്നുതന്നെ ടീസർ കാണുമ്പോൾ ഉറപ്പിക്കാം. ബാന്ദ്ര അടക്കി ഭരിക്കുന്ന അലൻ അലക്‌സാണ്ടർ ഡൊമനിക് എന്ന കഥാപാത്രത്തെയാണ് ദിലീപ് അവതരിപ്പിക്കുന്നത്. ‘ ഞാൻ റൺവേയിൽ കേറി നിൽക്കും പിന്നെയാണ് നിന്റെ വൺവേ..’ എന്ന ടീസറിലെ ഡയലോഗ് ഇതിനോടകം ഹിറ്റായി മാറിക്കഴിഞ്ഞു.
ഒരു നീണ്ട ഇടവേളയ്‌ക്ക് ശേഷം മലയാളത്തിന്റെ ജനപ്രിയ നടൻ ദിലീപ് കേന്ദ്ര കഥാപാത്രമായി എത്തുന്നചിത്രമാണ് ബാന്ദ്ര. ദിലീപിന്റെ കരിയറിലെ 147-ാം സിനിമയാണിത്. അരുൺ ഗോപിയാണ് ചിത്രം സംവിധാനം ചെയ്യുന്നത്. രാമലീല എന്ന സൂപ്പർ ഹിറ്റ് ചിത്രത്തിന് ശേഷം അരുൺ ഗോപിയും ദിലീപും വീണ്ടും ഒരുമിക്കുന്ന ചിത്രമാണ് ബാന്ദ്ര. ഉദയകൃഷ്ണ തിരക്കഥ ഒരുക്കിയിരിക്കുന്ന ഈ ബിഗ് ബജറ്റ് ചിത്രത്തിന്റെ നിർമ്മാണം വിനായക അജിത്ത് ആണ്. തെന്നിന്ത്യൻ സൂപ്പർനടി തമന്നയാണ് ചിത്രത്തിൽ ദിലീപിന്റെ നായികയാകുന്നത്. തമന്നയുടെ ആദ്യ മലയാളസിനിമ കൂടിയാണിത. തമിഴ് നടൻ ശരത് കുമാറും ബോളിവുഡ് നടൻ ദിനോ മോറിയയും ചിത്രത്തിലുണ്ട്.
ആക്ഷൻ രംഗങ്ങൾക്ക് ഏറെ പ്രാധാന്യമുള്ള ചിത്രത്തിൽ മൂന്ന് പേർ ചേർന്നാണ് സംഘട്ടനങ്ങൾ ഒരുക്കുന്നത്. അൻപറിവ്, ഫിനിക്‌സ് പ്രഭു, മാഫിയ ശശി എന്നിവരാണ് ആക്ഷൻ കോറിയോഗ്രാഫർമാർ. അഹമ്മദാബാദ്, സിദ്ധാപൂർ, രാജ്‌കോട്ട്, ഘോണ്ടൽ, ജയ്പൂർ, മുംബൈ, ഹൈദരാബാദ് തുടങ്ങിയ ഇടങ്ങളിലായിരുന്നു ബാന്ദ്രയുടെ ചിത്രീകരണം. ഷാജി കുമാറാണ് ചിത്രത്തിന്റെ ഛായാഗ്രഹണം. സംഗീതമൊരുക്കുന്നത് സാം സി എസ ആണ്. എഡിറ്റിംഗ് – വിവേക് ഹർഷൻ, പ്രൊഡക്ഷൻ ഡിസൈനർ – നോബിൾ ജേക്കബ്, കലാസംവിധാനം – സുബാഷ് കരുൺ, സൗണ്ട് ഡിസൈൻ – രംഗനാഥ് രവി, വസ്ത്രാലങ്കാരം – പ്രവീൺ വർമ്മ.
