മലയാളികളുടെ പ്രിയതാരം ബാല ആരോഗ്യം വീണ്ടെടുത്ത് ജീവിതത്തിലേക്ക് തിരികെയെത്തുന്നു. താരം കരൾമാറ്റ ശസ്ത്രക്രിയ കഴിഞ്ഞ് ആരോഗ്യം വീണ്ടെടുക്കുകയാണെന്ന വീഡിയോ ഭാര്യ എലിസബത്ത് പങ്കുവെച്ചിരിക്കുകയാണ്. മുമ്പ് ഒരു വലിയ ഫോട്ടോ തന്നെ ബാല പങ്കുവെച്ചിരുന്നു. പുതിയ വീഡിയോയിൽ ആരാധകർ ഏറെ സന്തോഷത്തിലാണ്. നടൻ ബാലയ്ക്കൊപ്പം ഭാര്യ എലിസബത്തുമുള്ള വീഡിയോയാണ് പങ്കുവെച്ചിരിക്കുന്നത്. രണ്ട് പേരും ഒന്നിച്ച് പുഞ്ചിരി തൂകി ഇരിയ്ക്കുന്ന വീഡിയോ ആരാധകർ ഇതിനോടകം തന്നെ ഏറ്റെടുത്തുകഴിഞ്ഞു.
മാർച്ച് ആദ്യവാരമാണ് ബാലയെ ആശുപത്രിയിൽ പ്രവേശിപ്പിച്ചത്. ആദ്യ ദിനങ്ങളിൽ ഗ്യാസ്ട്രോ എൻട്രോളജി വിഭാഗത്തിലായിരുന്നു ബാല. ഇതിന് പിന്നാലെയാണ് കരൾമാറ്റ ശസ്ത്രക്രിയയ്ക്ക് താരം വിധേയനായത്. ആരോഗ്യം മെച്ചപ്പെടുന്ന ഘട്ടത്തിൽ താരം തന്നെ ചിത്രങ്ങൾ പങ്കുവെച്ചിരുന്നു.
അൻപ് എന്ന തമിഴ് ചിത്രത്തിലൂടെയാണ് ബാല ബിഗ് സ്ക്രീനിലെത്തുന്നത്. താരത്തിന്റെ ആദ്യ മലയാള ചിത്രം കളഭം ആയിരുന്നു. മമ്മൂട്ടിയോടൊപ്പം ബിഗ്ബിയിൽ അഭിനയിച്ചതോടെയാണ് താരം കൂടുതൽ ശ്രദ്ധേയമാകുന്നത്. തുടർന്ന് പുതിയമുഖം, അലക്സാണ്ടർ ദി ഗ്രേറ്റ്, ഹീറോ, വീരം എന്നീ ചിത്രങ്ങളിൽ താരം പ്രധാന വേഷങ്ങളിലെത്തി. നായകവേഷത്തിലും സഹനടനായും വില്ലനായും ബാല അരങ്ങു തകർത്തിരുന്നു. ഉണ്ണി മുകുന്ദൻ നായകവേഷത്തിലെത്തിയ ഷെഫീക്കിന്റെ സന്തോഷം എന്ന ചിത്രമാണ് ബാലയുടേതായി ഏറ്റവും ഒടുവിൽ പ്രദർശനത്തിനെത്തിയ ചിത്രം.
