കേരള സന്ദർശനത്തിനെത്തിയ പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്താനായതിന്റെ സന്തോഷം പങ്കുവെച്ച് നടൻ ഉണ്ണി മുകുന്ദൻ. പ്രധാനമന്ത്രിയുടെ കേരള സന്ദർശനത്തിന്റെ ഭാഗമായി കൊച്ചിയിൽ സംഘടിപ്പിച്ച യുവം 2023 പരിപാടിയിൽ ഉണ്ണി മുകുന്ദനും സന്നിഹിതനായിരുന്നു. ഇതിന് പിന്നാലെയാണ് താരത്തിന് പ്രധാനമന്ത്രിയെ വ്യക്തിപരമായി കാണുന്നതിനുള്ള അവസരം ലഭിച്ചത്. പ്രധാനമന്ത്രിയുമായി 45 മിനിറ്റ് സംസാരിച്ചുവെന്നും ഗുജറാത്തിയിലാണ് ആശയവിനിമയം നടത്തിയതെന്നും ഉണ്ണിമുകുന്ദൻ സമൂഹമാദ്ധ്യമത്തിൽ പങ്കുവെച്ചു.
‘ഈ അക്കൗണ്ടിൽ നിന്നുള്ള ഏറ്റവും രോമാഞ്ചദായകമായ പോസ്റ്റ് ആണിത്. അങ്ങയെ ദൂരെ നിന്ന് കണ്ട 14 വയസ്സുകാരനിൽ നിന്ന് ഇന്ന് നേരിൽ കണ്ടുമുട്ടാൻ ഇടയായിരിക്കുന്നു. ആ നിമിഷങ്ങളിൽ നിന്ന് ഞാൻ ഇനിയും മോചിതനായിട്ടില്ല. അങ്ങനെ നേരിൽ കണ്ട് ഗുജറാത്തിയിൽ സംസാരിക്കുക എന്നത് എന്റെ വലിയ സ്വപ്നമായിരുന്നു. അത് സാധിച്ചിരിക്കുന്നു. അങ്ങ് നൽകിയ 45 മിനിറ്റ്, എന്റെ ജീവിതത്തിലെ ഏറ്റവും മികച്ച 45 മിനിറ്റ് ആയിരുന്നു. അങ്ങ് പറഞ്ഞ ഒരു വാക്ക് പോലും ഞാൻ ഒരിക്കലും മറക്കില്ല. ഓരോ ഉപദേശവും പ്രവൃത്തിയിലേക്ക് കൊണ്ടുവന്ന് ഞാൻ നടപ്പിലാക്കും. ജയ് ശ്രീകൃഷ്ണൻ’ – എന്നാണ് ഉണ്ണി മുകുന്ദൻ സമൂഹമാദ്ധ്യമത്തിൽ പങ്കുവെച്ചത്.
24 വർഷത്തോളം ഗുജറാത്തിൽ താമസിച്ചിരുന്ന ഉണ്ണിമുകുന്ദനോട് അവിടുത്തെ വിശേഷങ്ങൾ അദ്ദേഹം പങ്കുവെച്ചു. തന്നെപ്പറ്റി പല കാര്യങ്ങളും മനസിലാക്കിയാണ് അദ്ദേഹം സംസാരിച്ചതെന്ന് ഉണ്ണിമുകുന്ദൻ പറഞ്ഞു. ‘എന്നെപ്പറ്റി പലകാര്യങ്ങളും മനസിലാക്കിയാണ് അദ്ദേഹം എന്നോട് സംസാരിച്ചത്. എനിക്ക് 13 വയസ്സുള്ളപ്പോഴാണ് മോദിയെ ദൂരെ നിന്ന് ആദ്യമായി കാണുന്നത്. അന്ന് സിഎമ്മായി കണ്ടയാളെ ഇന്ന് പിഎമ്മായി കാണാൻ സാധിച്ചല്ലോ എന്ന് ഞാൻ പറഞ്ഞപ്പോൾ നിറഞ്ഞ ചിരിയിലായിരുന്നു അദ്ദേഹം. മാളികപ്പുറം സിനിമയെക്കുറിച്ചും മോദി സംസാരിച്ചു. ഗുജറാത്തിയിൽ സിനിമ ചെയ്യാനും അദ്ദേഹം ക്ഷണിച്ചു.’ – പ്രധാനമന്ത്രിക്കൊപ്പം ചെലവഴിച്ച അവിസ്മരണീയ നിമിഷങ്ങളെക്കുറിച്ച് ഉണ്ണി മുകുന്ദൻ പറഞ്ഞു.
സിനിമ താരങ്ങളായ അപർണ ബാലമുരളി, നവ്യ നായർ, ഗായകൻ വിജയ് യേശുദാസ് എന്നിവരും യുവം പരിപാടിയുടെ വേദിയിൽ സന്നിഹിതരായിരുന്നു. നവ്യാ നായരുടെയും സ്റ്റീഫൻ ദേവസ്യയുടെയും കലാപരിപാടികൾ ഇതിന്റെ ഭാഗമായി നടന്നിരുന്നു. സുരേഷ് ഗോപി, പ്രകാശ് ജാവദേക്കർ, അനിൽ ആന്റണി എന്നീ പ്രമുഖരും ബിജെപി നേതാക്കളും വേദിയുടെ ഭാഗമായി.
