ന്യൂഡൽഹി: ചത്തീസ്ഖണ്ഡിലെ കമ്മ്യൂണിസ്റ്റ് ഭീകരാക്രമണത്തിൽ സുരക്ഷാ ഉദ്യോസ്ഥർ വീര മൃത്യുവരിച്ച സംഭവത്തിൽ അനുശോചിച്ച് കേന്ദ്ര ആഭ്യന്തരമന്ത്രി അമിത് ഷാ. ദന്തേവാഡയിൽ നടന്ന ആക്രമണത്തിൽ 11 സുരക്ഷാ ഉദ്യോഗസ്ഥരാണ് വീരമൃതു വരിച്ചത്. ചത്തീസ്ഖണ്ഡിൽ സുരക്ഷാ ഉദ്യോഗസ്ഥർക്കു നേരെയുണ്ടായ ഭീരുത്വം നിറഞ്ഞ ആക്രമണത്തിൽ വേദനയുണ്ടെന്ന് അദ്ദേഹം ട്വീറ്റ് ചെയ്തു.
സംഭവത്തെ തുടർന്ന് ആഭ്യന്തരമന്ത്രി ചത്തീസ്ഖണ്ഡ് മുഖ്യമന്ത്രിയുമായി സംസാരിച്ചു. സംസ്ഥാനസർക്കാരിന് എല്ലാസഹായങ്ങളും അദ്ദേഹം ഉറപ്പ് നൽകി. വീരമൃത്യുവരിച്ച സുരക്ഷാ ഉദ്യോഗസ്ഥരുടെ കുടുംബങ്ങളെ അനുശോചനം അറിയിക്കുകയും ചെയ്തു.
സംഭവത്തിൽ പ്രധാനമന്ത്രി നരേന്ദ്രമോദി അനുശോചനമറിയിച്ചു.’ദന്തേവാഡയിൽ ഛത്തീസ്ഗഡ് പോലീസിന് നേരെ നടന്ന ആക്രമണത്തെ ശക്തമായി അപലപിക്കുന്നു. ആക്രമണത്തിൽ രാജ്യത്തിന് നഷ്ടപ്പെട്ട ധീര ജവാന്മാർക്ക് ആദരാഞ്ജലികൾ. ഈ ജീവത്യാഗം എന്നും ഓർമ്മിക്കപ്പെടും. വീരമൃത്യു വരിച്ചവരുടെ കുടുംബാംഗങ്ങൾക്ക് അനുശോചനം. ‘ ട്വിറ്ററിലൂടെ പ്രധാനമന്ത്രി അറിയിച്ചു.
50 കിലോഗ്രാം ഭാരമുള്ള ഐഇഡി ഉപയോഗിച്ചാണ് ആക്രമണം നടത്തിയതെന്ന് റിപ്പോർട്ട്. സ്ഫോടനം നടന്ന സ്ഥലത്ത് വലിയ ഗർത്തം രൂപപ്പെട്ടു. സുരക്ഷാ ഉദ്യോഗസ്ഥർ സഞ്ചരിച്ചിരുന്ന മിനിവാൻ തകരുകയും ചെയ്തു. കുഴി ബോംബ് സ്ഫോടനമാണ് നടന്നതെന്ന വിവരമാണ് പുറത്തുവന്നത്. ആക്രമണത്തിന് പിന്നിൽ പ്രവർത്തിച്ചവർക്കായുള്ള തിരച്ചിലിലാണ് പോലീസ്
