മണിരത്നത്തിന്റെ സംവിധാനത്തിൽ അരങ്ങേറിയ ബ്രഹ്മാണ്ഡ ചിത്രം പൊന്നിയൻ സെൽവൻ 2 റിലീസ് ചെയ്ത് രണ്ടാം ദിനത്തിൽ ആഗോളതലത്തിൽ 100 കോടി നേടി കുതിപ്പിലേക്ക്. നോർത്ത് അമേരിക്കയിൽ നിന്ന് 2.5 മില്യൺ (16 കോടി) ചിത്രം സ്വന്തമാക്കിക്കഴിഞ്ഞു. ഇന്ത്യയിൽ നിന്ന് മാത്രം രണ്ട് ദിവസത്തെ കളക്ഷൻ 57.9 കോടി രൂപയാണ്. ഈ വർഷം തമിഴകത്തെ ഏറ്റവും വലിയ ഓപ്പണിംഗ് ആണ് പിഎസ് 2 സ്വന്തമാക്കിയിരിക്കുന്നത്. തമിഴ്നാട്ടിൽ നിന്നും 36 കോടിയും കേരളത്തിൽ നിന്നും 5.5 കോടിയും ഇതുവരെ നേടി.
കേരളത്തിൽ മികച്ച പ്രേക്ഷക സ്വീകാര്യതയാണ് ചിത്രം നേടിയിരിക്കുന്നത്. ഈ വർഷം റിലീസ് ചെയ്ത തമിഴ് ചിത്രങ്ങളുടെ ആദ്യ ദിന വരുമാനം കണക്കാക്കുമ്പോൾ വിജയ് ചിത്രം വാരിസിന്റെ റെക്കോർഡാണ് പിഎസ് 2 തകർത്തിരിക്കുന്നത്. പൊന്നിയൻ സെൽവൻ ആദ്യ ഭാഗത്തെ പിഎസ്-2 മറികടക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ.
തമിഴ് സാഹിത്യകാരൻ കൽകിയുടെ ചരിത്ര നോവലിനെ ആസ്പദമാക്കിയാണ് ചിത്രം തയാറാക്കിയിരിക്കുന്നത്. ലൈക പ്രൊഡക്ഷൻസും മദ്രാസ് ടാക്കിസും സംയുക്തമായാണ് ചിത്രത്തിന്റെ നിർമ്മാണം നിർവഹിച്ചിരിക്കുന്നത്. ശ്രീഗോകുലം മൂവീസാണ് കേരളത്തിൽ വിതരണം നടത്തുന്നത്. തെന്നിന്ത്യയിൽ നിന്നും വൻ താരനിരയാണ് ചിത്രത്തിൽ അണിനിരക്കുന്നത്. വിക്രം, ജയംരവി, കാർത്തി, റഹ്മാൻ, പ്രഭു, ശരത് കുമാർ, ജയറാം, പ്രകാശ് രാജ്, ലാൽ, വിക്രം പ്രഭു, പാർത്ഥിപൻ, ബാബു ആന്റണി, അശ്വിൻ കാകുമാനു, റിയാസ് ഖാൻ, ഐശ്വര്യ റായ് ബച്ചൻ, തൃഷ, ശോഭിത ദുലിപാല, ജയചിത്ര തുടങ്ങി നിരവധി അഭിനേതാക്കളാണ് ചിത്രത്തിലുള്ളത്.
