സ്വർണം വാങ്ങുന്നവർ ഏറ്റവും കൂടുതൽ ആശങ്കപ്പെടുന്നത് സ്വർണത്തിന്റെ പരിശുദ്ധിയെ സംബന്ധിച്ചാണ്. ഒരു പവൻ സ്വർണ്ണം വാങ്ങാൻ ഇന്ന് നൽകേണ്ടത് അരലക്ഷത്തോളം രൂപയാണ്. അതിലാൽ
അതിന്റെ പരിശുദ്ധിക്ക് പ്രഥമ പരിഗണന നൽകേണ്ടതുണ്ട്. സ്വർണം വിൽക്കുമ്പോഴും വായ്പയ്‌ക്ക് ഈട് നൽകുമ്പോഴും മികച്ച വില ലഭിക്കാൻ സ്വർണത്തിന്റെ പരിശുദ്ധിയാണ് അളവുകോലായി എടുക്കുന്നത്. 24 കാരറ്റ് സ്വർണത്തിന്റെ ഏറ്റവും പരിശുദ്ധമായ രൂപമായി കണക്കാക്കപ്പെടുന്നു.
പരിശുദ്ധിയെ പറ്റി ചിന്തിക്കുന്നവർക്ക്, സുരക്ഷിതമായി സ്വർണം വാങ്ങാൻ കേന്ദ്രസർക്കാറിനെ സമീപിക്കാവുന്നതാണ്. ഇതിനായി കേന്ദ്ര സർക്കാറിന് കീഴിലുള്ള ഗവ. മിന്റിൽ നിന്ന് നേരിട്ട് സ്വർണം, വെള്ളി നാണയങ്ങൾ വാങ്ങാൻ സാധിക്കും.
കേന്ദ്ര ധനകാര്യമന്ത്രാലയത്തിന്റെ കീഴിലുള്ള മിന്റിലെ സ്വർണ നാണയങ്ങൾ ബ്യൂറോ ഓഫ് ഇന്ത്യൻ സ്റ്റാൻഡേർഡ്‌സ് (ബിഐഎസ്) ഹാൾമാർക്ക് പ്രകാരം സാക്ഷ്യപ്പെടുത്തിയവയാണ്. 99.9 ശതമാനം പരിശുദ്ധിയുള്ള 24 കാരറ്റ് സ്വർണമാണ് മിന്റുകളിൽ നിന്ന് വാങ്ങാൻ സാധിക്കുക. 5 ഗ്രാം, 10 ഗ്രാം, 50 ഗ്രാം എന്നിങ്ങനെ വിവിധ തൂക്കത്തിലുള്ള സ്വർണ, വെള്ളി നാണയങ്ങൾ ഇവിടെ നിന്നും സ്വന്തമാക്കാൻ സാധിക്കും. സെക്യൂരിറ്റി പ്രിന്റിംഗ് ആൻഡ് മിന്റിങ് കോർപ്പറേഷൻ ഓഫ് ഇന്ത്യ ലിമിറ്റഡ് എന്ന കേന്ദ്ര സർക്കാർ ഉടമസ്ഥതയിലുള്ള മിനിരത്ന കമ്പനിക്ക് കീഴിലാണ് മിന്റ് പ്രവർത്തിക്കുന്നത്.
കേന്ദ്ര സർക്കാറിന്റെ മിന്റ് എന്ന വെബ്സൈറ്റിൽ നിന്നോ വില്പന ശാലകളിൽ നിന്ന് നേരിട്ടോ സ്വർണം, വെള്ളി നാണയങ്ങൾ വാങ്ങാം. www.indiagovtmint.in എന്ന വെബ്‌സൈറ്റ് ഇതിനായി സന്ദർശിക്കുക. ഡൽഹി, നോയിഡ, മുംബൈ, ഹൈദരാബാദ്, കൊൽക്കത്ത എന്നി അഞ്ച് നഗരങ്ങളിലാണ് ഗവൺമെന്റ് മിന്റിന് വില്പന ശാലകളുള്ളത്. .
