ലോകം മുഴുവൻ ചുറ്റിക്കറങ്ങാൻ ആഗ്രഹിക്കുന്നവരാണ് ഭൂരിഭാഗമാളുകളും. പ്രകൃതി ഭംഗിയാലും നിർമിതികളുടെ മനോഹാരിതയാലും നൂറുകണക്കിന് രാജ്യങ്ങളാണ് വിനോദസഞ്ചാരികളെ ആകർഷിക്കുന്നത്. ഇതിൽ തന്നെ ഏറ്റവും കൂടുതൽ പേർ സന്ദർശിക്കുന്ന മൂന്ന് രാജ്യങ്ങളും അവിടുത്തെ നഗരങ്ങളും പരിചയപ്പെടാം..
ഈ പട്ടികയിൽ മൂന്നാം സ്ഥാനത്തുള്ള രാജ്യമാണ് യുണൈറ്റഡ് സ്റ്റേറ്റ്സ്. 79 ദശലക്ഷം വിനോദ സഞ്ചാരികളാണ് ഇവിടെ പ്രതിവർഷമെത്തുന്നത്. അമേരിക്കയിലെ ന്യൂയോർക്ക് സിറ്റിയിലാണ് ഏറ്റവുമധികം സഞ്ചാരികൾ എത്തുന്നത്. അമേരിക്കയിലേക്ക് ആകർഷിക്കുന്ന രണ്ടാമത്തെ നഗരം ലാസ് വിഗാസാണ്. ഫ്ളോറിഡയിലുള്ള ഓർലാൻഡോ എന്ന നഗരമാണ് അമേരിക്കയിൽ ഏറ്റവുമധികം വിനോദ സഞ്ചാരികളെത്തുന്ന മൂന്നാമത്തെ സ്ഥലം. ഇവിടെയാണ് ലോകപ്രശസ്തമായ ഡിസ്നി വേൾഡും യൂണിവേഴ്സൽ സ്റ്റുഡിയോസുമുള്ളത്.
ലോകത്തേറ്റവും അധികം ആളുകൾ എത്തുന്ന രണ്ടാമത്തെ രാജ്യമാണ് സ്പെയിൻ. ഇവിടേക്ക് 84 ദശലക്ഷം സഞ്ചാരികൾ ഓരോ വർഷവും എത്താറുണ്ട്. സ്പെയിനിലെ ബാഴ്സലോണയാണ് വിനോദ സഞ്ചാരികളുടെ പ്രിയപ്പെട്ട ഇടം. രണ്ടാം സ്ഥാനം തലസ്ഥാന നഗരമായ മാഡ്രിഡിനാണ്. അതുകഴിഞ്ഞാൽ സഞ്ചാരികളെ ആകർഷിക്കുന്ന മൂന്നാമത്തെ സ്പെയിൻ നഗരമാണ് സെവില്ലേ.
ലോകത്തേറ്റവുമധികം ആളുകൾ സന്ദർശിക്കുന്ന രാജ്യമെന്ന ബഹുമതി ഫ്രാൻസിനാണ്. പ്രതിവർഷം 89 ദശലക്ഷം ആളുകൾ ഫ്രാൻസിലേക്ക് എത്താറുണ്ട്. ലോകപ്രശസ്തമായ ഈഫൽ ടവർ കാണാൻ ഫ്രാൻസിലെ തലസ്ഥാന നഗരമായ പാരീസിലേക്കാണ് ഏറ്റവും കൂടുതൽ സഞ്ചാരികളുടെ ഒഴുക്ക്. ലോകത്തേറ്റവുമധികം ആളുകൾ എത്തുന്ന നഗരമെന്ന നേട്ടവും പാരീസിന് സ്വന്തമാണ്. വേഴ്സൈൽസ് എന്ന ഫ്രഞ്ച് നഗരവും മാഴ്സെയ്ൽ എന്ന നഗരവുമാണ് ഫ്രാൻസ് പ്രേമികളെ ആകർഷിക്കുന്ന മറ്റിടങ്ങൾ.
