ഇന്നത്തെക്കാലത്ത് നമ്മുടെ ദൈനംദിന ജീവിതത്തിൽ അവിഭാജ്യഘടകമാണ് മൊബൈൽ ഫോൺ. 24 മണിക്കൂറും നമ്മുടെ കൈയിലുണ്ടാവും ഈ ഉപകരണം. ഉറങ്ങുമ്പോൾ പോലും തൊട്ടരികിലോ, തലയിണയ്ക്കടിയിലോ വയ്ക്കുന്നു. എന്നാലിപ്പോൾ മൊബൈൽ പൊട്ടിത്തെറിക്കുന്നതായുള്ള വാർത്തകൾ നിരന്തരം റിപ്പോർട്ട് ചെയ്യപ്പെടാറുണ്ട്. ഇത്തരം വാർത്തകൾ മൊബൈൽ ഫോൺ ഉപയോക്താക്കളെ ആശങ്കപ്പെടുത്തുന്നു എന്നുള്ളത് വാസ്തവമാണ്.
എന്താണ് ഫോൺ പൊട്ടിത്തെറിക്കുന്നതിന് കാരണം?എങ്ങനെയാണ് ഒരു മൊബൈൽ ഫോൺ പൊട്ടിത്തെറിക്കുന്നത് ?എന്തുകൊണ്ടാണ് ഇങ്ങനെ സംഭവിക്കുന്നത്? മൊബൈൽ ഫോൺ എങ്ങനെ സൂക്ഷിക്കണം?. മൊബൈൽ ഫോൺ പൊട്ടിത്തെറിക്കുന്നത് പെട്ടെന്ന് സംഭവിക്കുന്നതാണെന്ന് കരുതരുത്. അപകടം വരുന്നതിന് മുൻപ് മൊബൈൽ ഫോൺ തന്നെ പലവിധത്തിലും നമുക്ക് സിഗ്നൽ തരുന്നുണ്ട്. അത് ശ്രദ്ധിക്കണം. വളരെ ശ്രദ്ധയോടെ കൈകാര്യം ചെയ്യേണ്ട ഒരു ഉപകരണമാണ് മൊബൈൽ ഫോൺ. കുഞ്ഞുങ്ങൾക്ക് കൊടുക്കുമ്പോൾ മാത്രമല്ല, മുതിർന്നവർ ഉപയോഗിക്കുമ്പോഴും നമ്മുടെ മൊബൈൽ ഫോണിൽ ശ്രദ്ധിക്കേണ്ടതായ ഒട്ടേറെ കാര്യങ്ങളുണ്ട്.
ഒരു മൊബൈൽ ഫോൺ പൊട്ടിത്തെറിക്കുന്നതിന് പിന്നിൽ പല കാരണങ്ങളാണ് ഉള്ളത്. അതിൽ ഏറ്റവും സാധാരണയായി കണ്ടുവരുന്നത് ഫോണിന്റെ ബാറ്ററി തകരാർ തന്നെയാണ്. സ്മാർട്ട് ഫോണുകളിൽ ലിഥിയം-അയേൺ ബാറ്ററികളാണ് ഉപയോഗിക്കുന്നത്. ഈ ബാറ്ററിക്ക് തകരാർ സംഭവിച്ചാൽ ബാറ്ററിയിലടങ്ങിയ വസ്തുക്കളിൽ രാസപ്രവർത്തനം നടക്കുകയും ഇത് പൊട്ടിത്തെറിയിലേക്ക് നയിക്കുകയും ചെയ്യുന്നു. എന്നാൽ എങ്ങനെയാണ് ബാറ്ററിക്ക് തകരാർ സംഭവിക്കുന്നത്? എന്ന് ചിന്തിച്ചിട്ടുണ്ടോ?. അമിതമായ ചൂടാണ് ഫോണിന്റെ ബാറ്ററികൾ തകരാറിലാകാനുള്ള പ്രധാന കാരണം. ചാർജ് ചെയ്തുകൊണ്ടിരിക്കുന്ന ബാറ്ററിയോ അമിതമായി പ്രവർത്തിക്കുന്ന പ്രൊസസറോ പെട്ടെന്ന് ചൂടാകുന്നത് ഫോണിന്റെ രാസഘടനയെ ബാധിക്കും. ഇത് ശൃംഖലാ പ്രതിപ്രവർത്തനം അഥവാ ചെയിൻ റിയാക്ഷനിലൂടെ ബാറ്ററി അമിത ചൂട് ഉത്പാദിപ്പിക്കുന്നതിന് കാരണമാവുകയും ഫോൺ പൊട്ടിത്തെറിക്കുന്നതിന് കാരണമാകുകയും ചെയ്യുന്നു.
അതുപോലെ വെയിലത്ത് ഫോൺ ഏറെ നേരം വയ്ക്കുക, സിപിയുവിന്റെ പ്രവർത്തനത്തെ ബാധിക്കുന്ന മാൽവെയറിന്റെ സാന്നിദ്ധ്യം, ചാർജിംഗിലെ പ്രശ്നം എന്നിങ്ങനെ ഫോൺ അമിതമായി ചൂടാകുന്നതിന് കാരണങ്ങളേറെയാണ്. മാത്രമല്ല വർഷങ്ങളേറെയായി ഉപയോഗിക്കുന്ന മൊബൈൽ ഫോണുകളുടെ ആന്തരിക ഘടകങ്ങൾ വീർക്കുകയും അമിതമായി ചൂടാകുകയും ചെയ്യാറുണ്ട്. ഇതും ഫോൺ പൊട്ടിത്തെറിക്ക് കാരണമാകും. നിർമ്മാണത്തിലെ അപാകതയും ഫോൺ പൊട്ടിത്തെറിയിലേക്ക് വഴിവെയ്ക്കാറുണ്ട്.അതേസമയം ഒരു വസ്തു പൊട്ടിത്തെറിക്കും മുൻപ് പുക ഉയരുകയോ മറ്റോ ചെയ്യാറുണ്ട്. എന്നാൽ ചിലസമയങ്ങളിൽ ഒരു ഫോൺ പൊട്ടിത്തെറിക്കും മുൻപ് കൃത്യമായ സൂചനകളൊന്നും തന്നെയുണ്ടാകില്ല. വളരെ പെട്ടെന്നുണ്ടാകുന്ന പൊട്ടിത്തെറിയായതിനാൽ തന്നെ ഫോണിന് സമീപമുള്ളവർക്ക് പരിക്കേൽക്കുകയും ചെയ്യും.
പക്ഷേ മൊബൈൽ ഫോൺ അപകടകാരിയാകുന്നുവെന്ന് കാണിക്കുന്ന ചില ലക്ഷണങ്ങളുണ്ട്. അത് നാം ശ്രദ്ധിക്കാതെ പോകരുത്. നേരത്തെ പറഞ്ഞത് പോലെ അമിതമായി ചൂടാകുന്നത് തന്നെയാണ് ഒരു ലക്ഷണം. അതുകൊണ്ട് തന്നെ ഫോൺ അമിതമായി ചൂടായാൽ അത് ചാർജിംഗിൽ ആണെങ്കിൽ ഉടൻ അൺപ്ലഗ് ചെയ്യാൻ ശ്രദ്ധിക്കുക. ബാറ്ററി വീർക്കുന്നതാണ് രണ്ടാമത്തെ ലക്ഷണം. ഫോൺ ബാറ്ററി വീർക്കുക, സ്ക്രീൻ യാതൊരു കാരണവുമില്ലാതെ പൊട്ടുക, ഫോൺ ചേസ് വീർത്ത് നിരപ്പായ പ്രതലത്തിൽ ഫോൺ വച്ചാലും അത് പ്രതലത്തോട് ചേർന്നിരിക്കാതിരിക്കുക തുടങ്ങിയ ലക്ഷണങ്ങൾ ഫോൺ അപകടകാരിയാകുന്നുവെന്ന് കാണിക്കുന്ന ചില ലക്ഷണങ്ങളാണ്. മൊബൈൽ ഫോൺ ഉപയോഗിക്കുന്നതിൽ ശ്രദ്ധിച്ചാൽ വലിയ അപകടങ്ങളിൽ നിന്ന് നമുക്ക് ഒഴിവാക്കാം.
മൊബൈൽ ഫോൺ ഉപയോഗിക്കുന്നതിൽ ശ്രദ്ധിക്കേണ്ട കാര്യങ്ങൾ ഏതെല്ലാമാണ് എന്നുനോക്കാം;
- മൊബൈൽ ഫോണിന്റെ ബോഡിക്ക് വരുന്ന തകരാറുകൾ ഒഴിവാക്കാനായി ഫോൺ കവർ ഉപയോഗിക്കുക.
- പൊരിവെയിലത്ത് നിന്നും, കനത്ത ചൂടിൽ നിന്ന് മൊബൈൽ ഫോണിനെ സംരക്ഷിക്കുക
- ഉറങ്ങുന്നിടത്ത് നിന്ന് ദൂരെ മാറി മാത്രം മൊബൈൽ ഫോൺ ചാർജിംഗിൽ ഇടുക
- നല്ല ബാറ്ററി ഹൈജീൻ നിലനിർത്തുക. മൊബൈൽ ഫോൺ ബാറ്ററി 30 ശതമാനത്തിലേക്ക് താഴുമ്പോൾ ചാർജ് ചെയ്യാനിടുകയും ബാറ്ററി 80 ശതമാനത്തിലെത്തുമ്പോൾ ചാർജിംഗ് അവസാനിപ്പിക്കുകയും ചെയ്യുന്നതാണ് നല്ലത്.
- ചാർജിംഗിനായി മൊബൈൽ ഫോൺ കമ്പനി നൽകിയ ചാർജറും കേബിളും മാത്രം ഉപയോഗിക്കുക. മറ്റ് ഫോൺ ചാർജറുകൾ ഉപയോഗിക്കാതിരിക്കുക.
- മൊബൈൽ ഫോണിനെ ആക്രമിക്കുന്ന മാൽവെയറുകളെ കരുതിയിരിക്കുക.
- നിർമ്മാണത്തിലെ അപാകതയും മൊബൈൽ ഫോണുകൾ പൊട്ടിത്തെറിക്കാറുണ്ട്. അത്തരം സന്ദർഭങ്ങളിൽ ഉപയോക്താവ് നിസ്സഹായനാണ്. അതിന് ഒന്നും ചെയ്യാൻ കഴിയില്ല. നല്ല ബാറ്ററി പെർഫോമൻസുള്ള ഫോണുകൾ നോക്കി ഉപയോഗിക്കുക.
