മലയാളസിനിമയുടെ താരരാജാവായ പ്രിയനടൻ മോഹൻലാലിന്റെ ജന്മദിനമാണ് ഇന്ന്. പ്രായഭേദമന്യേ, ലോകമെമ്പാടുമുള്ള അനേകം ആരാധകർ അദ്ദേഹത്തിന് ആശംസ നേർന്നു. കലാ- രാഷ്ട്രീയ- സാംസ്കാരിക-മേഖലകളിലുള്ളവരും ആശംസകൾ അറിയിച്ച് രംഗത്തുവന്നു. സമൂഹമാദ്ധ്യമങ്ങൾ ആകെ ലാലേട്ടൻ നിറഞ്ഞുനിൽക്കുകയാണ്. ഇപ്പോഴിതാ തന്റെ ജന്മദിനത്തിൽ മോഹൻലാൽ പങ്കുവെച്ച ചിത്രങ്ങളാണ് വൈറലായിരിക്കുന്നത്.
അഭയകേന്ദ്രത്തിലെ കുഞ്ഞുങ്ങൾക്കൊപ്പം പിറന്നാൾ ആഘോഷിക്കുന്ന തന്റെ ചിത്രങ്ങളാണ് ലാലേട്ടൻ പങ്കുവച്ചിരിക്കുന്നത്. ‘കൊച്ചു മാലാഖമാരുടെ അനുഗ്രഹങ്ങളോടെ ഒരു എളിയ ജന്മദിന ആഘോഷം’, ഈ ദിവസത്തിന് നന്ദി’- എന്നാണ് ചിത്രങ്ങൾക്കൊപ്പം മോഹൻലാൽ സമൂഹമാദ്ധ്യമങ്ങളിൽ കുറിച്ചത്.
ഹം(എച്ച്.യു.എം) ഫൗണ്ടേഷൻ നടത്തുന്ന ഷെൽട്ടർ ഹോമായ ഏഞ്ചൽസ് ഹട്ടിലെ കുഞ്ഞുങ്ങൾക്കൊപ്പം ആണ് മോഹൻലാൽ ജന്മദിനം ആഘോഷിച്ചത്. കേക്ക് മുറിച്ച് ജന്മദിനം ആഘോഷിച്ച ലാലേട്ടൻ കുഞ്ഞുങ്ങൾക്ക് സമ്മാനപ്പൊതികളും കൈമാറി. നിരവധിപ്പേരാണ് ചിത്രങ്ങൾക്ക് കമന്റുകൾ നൽകിയിരിക്കുന്നത്. ഏവരുടെയും ഹൃദയം കവരുന്ന ചിത്രങ്ങളാണ് എന്നാണ് ആരാധകർ പറയുന്നത്.
