ന്യൂഡൽഹി: പ്രധാനമന്ത്രി നരേന്ദ്രമോദിയുടെ ത്രിരാഷ്ട്ര സന്ദർശനം വിജയകരമാണെന്ന് വിദേശകാര്യ സഹമന്ത്രി മീനാക്ഷി ലേഖി. പ്രധാനമന്ത്രി നരേന്ദ്രമോദി നമ്മുടെ ഭാരതസംസ്കാരത്തെയും ജനാധിപത്യ മൂല്യങ്ങളെയും ലോകത്തിന് മുൻപിൽ പ്രതിനിധീകരിച്ചുവെന്നും മീനാക്ഷി ലേഖി കൂട്ടിച്ചേർത്തു.
‘പ്രധാനമന്ത്രി നമ്മുടെ രാജ്യത്തിന് ബഹുമതികളും പുരസ്കാരങ്ങളും അംഗീകാരങ്ങളും കൊണ്ടുവന്നു. അദ്ദേഹത്തിന്റെ സമീപകാല രാഷ്ട്ര സന്ദർശനങ്ങൾ എല്ലാം വിജയകരമായിരുന്നു. ലോക നേതാക്കൾ ഭാരതത്തെ എങ്ങനെ ആദരിച്ചുവെന്ന് നാം കണ്ടു. ലോക രാജ്യങ്ങൾ നമ്മുടെ പ്രധാനമന്ത്രിയെ ബഹുമാനിക്കുമ്പോൾ, ഇന്ത്യയിലെ ജനങ്ങളും ബഹുമാനിക്കപ്പെടുന്നു’- ലേഖി പറഞ്ഞു.
വ്യാഴാഴ്ച പുലർച്ചെയാണ് ജപ്പാൻ, പാപ്പുവ ന്യൂഗിനി, ഓസ്ട്രേലിയ എന്നീ രാജ്യങ്ങളിലെ സന്ദർശനം പൂർത്തിയാക്കി പ്രധാനമന്ത്രി നരേന്ദ്രമോദി ഇന്ത്യയിൽ തിരിച്ചെത്തിയത്. ഡൽഹി വിമാനത്താവളത്തിൽ എത്തിയ പ്രധാനമന്ത്രിയെ ബിജെപി ദേശീയ അദ്ധ്യക്ഷൻ ജെപി നദ്ദയും പാർട്ടി നേതാക്കളും ഹാരമണിയിച്ചാണ് സ്വീകരിച്ചത്.
