തിരുവനന്തപുരം : തിരുവനന്തപുരം അന്താരാഷ്ട്ര വിമാനത്താവളത്തിൽ നിന്നുള്ള യാത്ര സുഗമമാകാൻ പുതിയ ഇ-ഗേറ്റ് സംവിധാനം നടപ്പിലാക്കി. യാത്രക്കാരുടെ സൗകര്യത്തിനായാണ് ഇ-ഗേറ്റുകൾ സ്ഥാപിക്കുന്നത്. ക്യു ആർ കോഡ് സ്‌കാനറോടുകൂടിയ ആറ് ഇ-ഗേറ്റുകളാണ് വിമാനത്താവളങ്ങളിൽ സ്ഥാപിച്ചിരിക്കുന്നത്.
വിമാനത്താവളത്തിൽ ഇ-ഗേറ്റ് സ്ഥാപിച്ചതോടുകൂടി യാത്രക്കാർക്ക് സ്വന്തമായി ചെക്ക് ഇൻ ചെയ്ത ശേഷം ബോർഡിങ് പാസ് ഇ-ഗേറ്റുകളിൽ സ്‌കാൻ ചെയ്ത് സെക്യൂരിറ്റി ഹോൾഡിംഗ് ഏരിയയിലേക്ക് (എസ്എച്ച്എ) പ്രവേശിക്കാൻ സാധിക്കും. നേരത്തെ ഉദ്യോഗസ്ഥർബാർഡിങ് പാസ് നേരിട്ട് പരിശോധിച്ച് യാത്രക്കാരെ കടത്തിവിടുന്ന രീതിയായിരുന്നു നടപ്പിലാക്കിയിരുന്നത്. ഇ-ഗേറ്റ് വരുന്നതോട് കൂടി യാത്രക്കാർക്ക് പരിശോധന നടപടികൾ വേഗത്തിലാക്കാനും തിരക്കുള്ള സമയങ്ങളിൽ ഏറെ നേരം വരിനിൽക്കേണ്ടി വരുന്നത് ഒഴിവാക്കാനും കഴിയുമെന്ന് അധികൃതർ വ്യക്തമാക്കി.
വിമാനത്താവളത്തിന്റെ ആഭ്യന്തര, അന്താരാഷ്ട്ര ടെർമിനലുകളുടെ പ്രീസെക്യൂരിറ്റി ഹോൾഡ് ഏരിയയിലാണ് ഇ-ഗേറ്റുകൾ സ്ഥാപിച്ചിരിക്കുന്നത്. ഇ-ഗേറ്റുകൾ വഴി എയർലൈനുകൾക്ക് ടെർമിനലിനുള്ളിൽ യാത്രക്കാർ എവിടെയുള്ളതെന്ന് എളുപ്പത്തിൽ കണ്ടെത്താനും വിമാനത്താവളത്തിലെ സുരക്ഷാ സംവിധാനം മെച്ചപ്പെടുത്താനും സാധിക്കും.
