അമൂൽ ലസ്സിയുടെ പാക്കറ്റിൽ ഫംഗസ് ഉണ്ടെന്ന് ആരോപണം വ്യാജമാണെന്ന് കമ്പനി അറിയിച്ചു. തങ്ങൾക്കെതിരെ വ്യാജ വിവരങ്ങൾ പ്രചരിപ്പിക്കുകയും ഉപഭോക്താക്കളിൽ ഭയം പരത്തുകയും ചെയ്യുന്ന വീഡിയോയാണ് പ്രചരിപ്പിക്കുന്നതെന്ന് കമ്പനി ആരോപിച്ചു. ട്വിറ്ററിലൂടെയാണ് കമ്പനി പ്രതികരിച്ചത്.
വീഡിയോയിൽ പറയുന്ന ആരോപണങ്ങളെ തള്ളിക്കളയുന്നു എന്ന് അമൂൽ ട്വിറ്ററിൽ പ്രതികരിച്ചു. പ്രചരിക്കുന്ന വീഡിയോ വ്യാജമാണെന്നും അമൂൽ ഉത്പ്പന്നങ്ങളെക്കുറിച്ച് തെറ്റായ വിവരങ്ങളാണ് പ്രചരിപ്പിക്കുന്നതെന്നും കമ്പനി ട്വീറ്റ് ചെയ്തു. ഉത്പ്പന്നങ്ങളിൽ കൃത്യമായ ഗുണനിലവാര പരിശോധനകൾ നടത്തുന്നുണ്ടെന്നും അത്യാധുനിക സംവിധാനങ്ങൾ ഉപയോഗിച്ചാണ് ഉത്പ്പന്നങ്ങൾ ഉണ്ടാക്കുന്നതെന്നും അമൂൽ ട്വീറ്റിൽ കൂട്ടിച്ചേർത്തു.
വീഡിയോയിൽ കാണുന്ന അമൂൽ പായ്‌ക്കറ്റിന് കേടുപാടുകൾ സംഭവിച്ചിട്ടുണ്ട്. ഇത് ഫംഗസ് വരാൻ കാരണമാകാം. എന്നാൽ ഈ വീഡിയോ പകർത്തിയ വ്യക്തി തങ്ങളെ ബന്ധപ്പെട്ടിട്ടില്ലെന്നും എവിടെ നിന്നാണ് ഈ പായ്‌ക്കറ്റ് വാങ്ങിയതെന്ന് പറഞ്ഞിട്ടില്ലെന്നും അമൂൽ പറഞ്ഞു.
