ഭിന്ദ്: മദ്ധ്യപ്രദേശ് മന്ത്രി ഒപിഎസ് ഭദോരിയയ്ക്ക് വാഹനാപകടത്തിൽ പരിക്ക്. മന്ത്രി സഞ്ചരിച്ച കാർ ട്രാക്ടറുമായി കൂട്ടിയിടിക്കുകയായിരുന്നു. ഭിന്ദ് ജില്ലയിലെ മലൻപൂർ പ്രദേശത്ത് വെച്ചാണ് അപകടം. ഭദോരിയയെ ഉടൻ തന്നെ ഗ്വാളിയോറിലെ ബിർള ആശുപത്രിയിൽ പ്രവേശിപ്പിച്ചു.
മന്ത്രിയുടെ നിലയെപ്പറ്റി ബിർള ആശുപത്രിയിലെ ഫിസിഷ്യൻ ഡോ. അജിത് തിവാരി മാദ്ധ്യമങ്ങളോട് പ്രതികരിച്ചു. തലയ്ക്ക് പരിക്കേറ്റതിനാൽ, ഭഡോറിയയെ ക്രിട്ടിക്കൽ കെയർ വാർഡിൽ പ്രവേശിപ്പിച്ചു. നിലവിൽ ഒരു സംഘം ഡോക്ടർമാരുടെ നിരീക്ഷണത്തിലാണ് മന്ത്രി എന്നും ഡോ. തിവാരി പറഞ്ഞു.
ഗ്വാളിയോറിൽ നിന്ന് മെഹ്ഗാവിലേക്ക് പോകുന്നതിനിടെ ഉച്ചയ്ക്ക് ശേഷമാണ് അപകടമുണ്ടായത്. വാഹനങ്ങൾ തമ്മിലുള്ള കൂട്ടിയിടിയിൽ മന്ത്രി ഭഡോറിയക്ക് മാത്രമല്ല, കാർ ഡ്രൈവർക്കും അദ്ദേഹത്തോടൊപ്പമുണ്ടായിരുന്ന സുരക്ഷാ ഉദ്യോഗസ്ഥർക്കും പരിക്കേറ്റിട്ടുണ്ടെന്ന് പോലീസ് വ്യക്തമാക്കി. മന്ത്രിയും അപകടത്തിൽ പരിക്കേറ്റവരും വേഗത്തിൽ സുഖം പ്രാപിക്കാൻ പ്രാർത്ഥിക്കുന്നുവെന്ന് മദ്ധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാൻ പറഞ്ഞു.
