പത്തനംതിട്ട: പ്രദേശത്തെ മാലിന്യങ്ങൾ മുഴുവൻ കുമിഞ്ഞു കൂടി നീരൊഴുക്ക് തടസ്സപ്പെട്ട് തിരുവല്ല നഗരത്തിലെ ഓടകൾ. സ്ഥലത്ത് അഗ്നിരക്ഷാ സേനയെത്തി പരിശ്രമിച്ചിട്ടും ഫലമുണ്ടായില്ല. മല്ലപ്പള്ളി റോഡിലെ ദീപ ജംഗഷ്‌നിലുള്ള കലുങ്കിന്റെ ഇരുവശത്ത് നിന്നും 5,000 ലിറ്ററോളം വെള്ളമാണ് അഗ്നിരക്ഷാ സേന ഇന്നലെ പമ്പ് ചെയ്ത് കളഞ്ഞത്. എന്നാൽ കലുങ്കിനടിയിൽ കെട്ടിക്കിടക്കുന്ന മാലിന്യത്തിന്റെ ചെറിയൊരു അംശം പോലും പുറത്തേക്ക് പോയില്ല. ദീപ ജംഗ്ഷൻ മുതൽ ചിലങ്ക ജംഗ്ഷൻ വരെയുള്ള റോഡരികിലെ ഓട നിറഞ്ഞ് കിടക്കാൻ തുടങ്ങിയിട്ട് ദിവസങ്ങളേറെയായി. റോഡിനടിയിൽ കലുങ്കും എതിർവശത്ത് കൂടി രാമൻചിറ ഭാഗത്തേക്ക് ഓടയുമുണ്ട്.
ഓട വൃത്തിയാക്കി നോക്കിയെങ്കിലും വെള്ളം ഒഴുകി പോകാത്ത സാഹചര്യമാണ് നിലവിലുള്ളത്. ഇതോടെ നടത്തിയ പരിശോധനയിലാണ് കലുങ്കിനടിയിലാണ് തടസ്സമെന്ന് കണ്ടെത്തിയത്. മാലിന്യം തിങ്ങി നിറഞ്ഞ് കിടക്കുന്നതിനാൽ ആളെ കയറ്റി വൃത്തിയാക്കുന്നത് അപകടത്തിന് സാദ്ധ്യതയുള്ളതിനാലാണ് അഗ്നിരക്ഷാ സേനയുടെ സഹായം തേടിയത്. കലുങ്കിന്റെ ഇരുവശത്ത് കൂടിയും വെള്ളം പമ്പ് ചെയ്ത് നോക്കിയെങ്കിലും വെള്ളം പാഴായതല്ലാതെ മറ്റ് പ്രയോജനങ്ങളൊന്നുമുണ്ടായില്ല.
കലുങ്കിന്റെ വെള്ളം ഒഴുകേണ്ട ഭാഗത്ത് കൂടി ജല അതോറിറ്റിയുടെ വലിയ പൈപ്പുകൾ, ബിഎസ്എൻഎൽ കേബിളുകൾ എന്നിവ പോകുന്നുണ്ട്. വലിയ ചാക്കുകെട്ടുകൾ ഉൾപ്പെടെ ഓടയിലൂടെ ഒഴുക്കി വിട്ടത് കലുങ്കിനടിയിൽ തടസ്സപ്പെട്ട് കിടക്കുകയാണ്. ഇതാണ് വെള്ളം ഒഴുകാതെ പ്രദേശത്ത് കെട്ടിക്കിടക്കുന്നത്. നഗരസഭ, പോതുമരാമത്ത്, ജല അതോറിറ്റി, ബിഎസ്എൻഎൽ, പോലീസ്, അഗ്നിരക്ഷാ സേന എന്നീ വകുപ്പുകളുടെ സഹകരണത്തോടെ ഗതാഗതം തടസ്സപ്പെടുത്തി കലുങ്ക് ശുചീകരിക്കുന്നതിനുള്ള ശ്രമങ്ങൾ നടത്തിയിരുന്നു. ഇത് വിജയിക്കാത്തതിനാൽ റോഡ് പൊളിച്ചു നീക്കി കലുങ്ക് വൃത്തിയാക്കുകയാണ് മാർഗ്ഗം.
