മലയാള സിനിമയിൽ പകരംവെക്കാനില്ലാത്ത സൂപ്പർ താരങ്ങളാണ് മമ്മൂട്ടിയും മോഹൻലാലും. ഏകദേശം ഒരേ കാലയളവിൽ ആരംഭിച്ച്, ആദ്യകാലത്ത് നിരവധി ചിത്രങ്ങളിൽ ഒരുമിച്ച് അഭിനയിച്ച്, തൊണ്ണൂറുകളോടെ തന്നെ സൂപ്പർതാര പദവിയിലേക്ക് ഉയർത്തപ്പെട്ടവരാണ് ഇരുവരും. മോഹൻലാൽ-മമ്മൂട്ടി എന്ന പേര് ഇന്ന് മലയാള സിനിമ ആരാധകർക്ക് അഭിമാനമാണ്. താരങ്ങളുടെ സിനിമയെത്തുമ്പോൾ മത്സരമാണ് പ്രക്ഷകർക്ക്, എന്നാൽ ഇതിനപ്പുറം മനോഹരമായ ഒരു വ്യക്തിബന്ധം സൂക്ഷിച്ചവരാണ് ഇരുവരും. ഇപ്പോഴിതാ ഇരുവരുടെയും കുടുംബങ്ങൾ ഒത്തുചേർന്ന രണ്ട് ഫ്രെയ്മുകൾ സമൂഹമാദ്ധ്യമങ്ങളിൽ വൈറൽ ആവുകയാണ്.
ആദ്യത്തേത് 35 വർഷങ്ങൾ മുൻപുള്ളതും രണ്ടാമത്തേ ചിത്രം കഴിഞ്ഞ ദിവസം എടുത്തതുമാണ്. മോഹൻലാലിന്റെ വിവാഹദിവസം ഭാര്യ സുൽഫത്തിനൊപ്പമെത്തിയ മമ്മൂട്ടി നവവരനായ മോഹൻലാലിനും സുചിത്രയ്ക്കുമൊപ്പം നിൽക്കുന്ന ചിത്രമാണ് ഒന്ന്. രണ്ടാമത്തെ ചിത്രം ലുലു ഗ്രൂപ്പ് ചെയർമാൻ എം എ യൂസഫ് അലിയുടെ സഹോദരനും ലുലു എക്സിക്യൂട്ടീവ് ഡയറക്ടറുമായ എം എ അഷ്റഫ് അലിയുടെ മകൾ ഫഹിമയുടെ വിവാഹത്തിന് മമ്മൂട്ടിയും മോഹൻലാലും കുടുംബസമേതം എത്തിച്ചേർന്നപ്പോൾ എടുത്തതാണ്. ഈ രണ്ട് ചിത്രങ്ങളും ചേർത്തുവച്ച് ഇരുവരുടെയും ഫാൻ ഗ്രൂപ്പുകളും സമൂഹമാദ്ധ്യമങ്ങളിലും സിനിമാഗ്രൂപ്പുകളുമൊക്കെ പങ്കുവെക്കുന്നുണ്ട്.
