മോട്ടാർ വാഹന വകുപ്പിന്റെ എഐ ക്യാമറകൾ നിരത്തുകളിൽ മിഴി തുറന്ന് പണി തുടങ്ങി കഴിഞ്ഞു. ഇത്തരത്തിൽ ക്യാമറയിൽ കുടുങ്ങി പലർക്കും നോട്ടീസ് വന്നിട്ടുമുണ്ടാകും. പിഴ തുക എവിടെ അടയ്ക്കണമെന്നറിയാതെ ആർടിഒ ഓഫീസിലേക്ക് എത്തുന്നവരുടെ എണ്ണം വർദ്ധിക്കുകയാണ്. എന്നാൽ പിഴ അടയ്ക്കേണ്ടത് ഓൺലൈൻ വഴിയാണെന്ന് എത്ര പേർക്കറിയാം?
ഒരു നിയമലംഘനം എഐ ക്യാമറ പകർത്തുന്നതിനൊപ്പം ഒരു അറിയിപ്പ് വാഹന ഉടമയുടെ രജിസ്റ്റർ ചെയ്ത വിലാസത്തിലേക്കോ പിന്നീട് ഇ-മെയിലിലേക്കോ മൊബൈൽ നമ്പറിലേക്കോ അയച്ചേക്കാം. സാധാരണയായി നിയമലംഘനത്തിന്റെ തീയതി, സമയം, സ്ഥലം, സ്ഥാനം, സ്വഭാവം, ചിത്രം എന്നിവയടക്കമുള്ള വിശദാംശങ്ങളാണ് നോട്ടീസിൽ ഉള്ളത്. അടയ്ക്കേണ്ട തുക, സ്വീകാര്യമായ പേയ്മെന്റ് രീതികൾ, പേയ്മെന്റിനുള്ള സമയപരിധി എന്നിവയും നിർദ്ദേശത്തിലുണ്ട്. ഇ-ചലാൻ ഡോട്ട് പരിവാഹൻ എന്ന വെബ്സൈറ്റിലൂടെ സ്വന്തമായോ അക്ഷയകേന്ദ്രം വഴിയോ പിഴ അടയ്ക്കാവുന്നതാണ്. 30 ദിവസമാണ് പിഴ അടയ്ക്കാനുള്ള സമയപരിധി. ഇല്ലെങ്കിൽ കോടതിയിൽ അടയ്ക്കേണ്ടി വരും. പരാതി ഉണ്ടെങ്കിൽ 15 ദിവസത്തിനകം ആർടിഒ എൻഫോഴ്സ്മെന്റ് ഓഫീസിൽ അറിയിക്കണം.
തിരുവനന്തപുരം മൺവിളയിലെ കെൽട്രോൺ ഡേറ്റാ സെന്റർ ബാങ്കിലാണ് ദൃശ്യം ശേഖരിക്കുക.അവിടെ നിന്ന് ലിസ്റ്റ് ചെയ്ത് ജില്ലാ കൺ്ട്രോൾ റൂമിലെത്തും. ഇവ നാഷണൽ ഇൻഫോർമാറ്റിക് സെന്ററിന് കൈമാറി, ഇ-ചാലൻ ആക്കും.
പിഴ അടയ്ക്കേണ്ടത് ഇങ്ങനെ:
https://vahan.parivahan.gov.in/ എന്ന വെബ്സൈറ്റിൽ വാഹൻ ലോഗിൻ സെക്ഷനിലെത്തിയോ അല്ലെങ്കിൽ ഓൺലൈൻ സർവീസസ് എന്നതിലെ വെഹിക്കിൾ റിലേറ്റഡ് സർവീസ് എന്നതോ ഓപ്പൺ ചെയ്യുക. തുടർന്ന് തുറന്ന് വരുന്ന പേജിൽ വാഹനത്തിന്റെ രജിസ്റ്റർ നമ്പർ നൽകുക. സർവീസസ് എന്നത് തിരഞ്ഞെടുക്കുക. തുടർന്ന് ടാക്സ്/ ഫീ സർവീസ് തിരഞ്ഞെടുക്കുക. പിന്നാലെ കോംപൗണ്ടിംഗ് ഫീസ് എന്നിതിലെത്തും. തുടർന്ന് ഷാസി നമ്പറിന്റെ അവസാനത്തെ അഞ്ചക്കം, രജിസ്ട്രേഷൻ നമ്പർ എന്നിവ നൽകിയ ശേഷം പിഴ അടയ്ക്കാവുന്നതാണ്. രസീത് ഡൗൺലോഡ് ചെയ്യാവുന്നതുമാണ്.
https://echallan.parivahan.gov.in/ എന്ന സെറ്റിൽ പേ ഓൺലൈൻ ഓപ്ഷനിൽ ക്ലിക്ക് ചെയ്താലും പിഴ അടയ്ക്കാവുന്നതാണ്. തുറന്ന് വരുന്ന പേജിൽ വാഹന നമ്പർ നൽകുക. അതിന് താഴെ ഷാസി നമ്പർ എന്ന എൻജിൻ നമ്പറിന്റെ അവസാനത്തെ അഞ്ച് അക്കം എന്റർ ചെയ്യുക. ഗെറ്റ് ഡീറ്റെയ്ൽ എന്ന ഓപ്ഷനിൽ ക്ലിക്ക് ചെയ്താൽ ഇതുവരെയുള്ള ചലാൻ വിവരങ്ങൾ കാണാവുന്നതാണ്. അടച്ച തുകയും ഇനി അടയ്ക്കാനുള്ളതും ഇതിലുണ്ടാകും. പെൻഡിംഗിൽ ക്ലിക്ക് ചെയ്താൽ പിഴ അറിയാൻ കഴിയും. എവിടെ, ഏതൊക്കെ സ്ഥലങ്ങളിൽ എന്നതടക്കം പൂർണ വിവരം ലഭിക്കും. ഈ വിൻഡോയിൽ തന്നെ പിഴയും അടയ്ക്കാവുന്നതാണ്.
Comments