ന്യൂഡൽഹി: ഡൽഹിയിലെ അന്താരാഷ്ട്ര വിമാനത്താവളത്തിൽ ഇനി യാത്രക്കാർക്ക് ആപ്പുകൾ ഉപയോഗിക്കാതെ തന്നെ ഡിജിയാത്ര സൗകര്യം ലഭിക്കും. വിമാനത്താവളത്തിലെ ടെർമിനൽ മൂന്നിലായിരിക്കും സൗകര്യം ലഭിക്കുക. സ്വകാര്യ എയർപോർട്ട് ഓപ്പറേറ്ററായ ഡൽഹി ഇന്റർനാഷണൽ എയർപോർട്ട് ലിമിറ്റഡ് ഈ കഴിഞ്ഞ വ്യാഴായ്ചയാണ് ഇക്കാര്യം ഔദ്യോഗികമായി അറിയിച്ചത്. ടെർമിനൽ മൂന്നിൽ യാത്രക്കാർക്ക് അവരുടെ മുഖം തിരിച്ചറിയൽ രേഖയായി ഉപയോഗിച്ചുകൊണ്ട് ലളിതമായ മൂന്ന് ഘട്ടങ്ങളിലൂടെ രജിസ്ട്രേഷൻ പ്രക്രിയ പൂർത്തീകരിക്കാൻ സാധിക്കും.
വിമാനത്താവളങ്ങളിൽ യാത്രികർക്ക് ബുദ്ധിമുട്ടികളില്ലാതെ സൗകര്യപ്രദമായി യാത്ര ചെയ്യുന്നതിനാണ് ഡിജിയാത്രാ സംവിധാനം കേന്ദ്ര സർക്കാർ ആരംഭിച്ചത്. യാത്രക്കാർ ഡിജി ആപ്പുകൾ ഉപയോഗിച്ചുകൊണ്ട് വിശദാംശങ്ങൾ പങ്കുവെയ്ക്കുന്നതോടെ കാത്ത് നിൽക്കേണ്ടതായ സാഹചര്യം ഒഴിവാകും. മുൻപ് ഡിജിയാത്ര സൗകര്യം പ്രയോജനപ്പെടുത്തുന്നതിനായി ഉപയോക്താക്കൾക്ക് അവരുടെ ഫോണിൽ ഡിജിയാത്ര ആപ്ലിക്കേഷൻ ഡൗൺലോഡ് ചെയ്ത് ആധാറുമായി ബന്ധിപ്പിച്ച നമ്പർ ഉപയോഗിച്ച് രജിസ്റ്റർ ചെയ്യണമെന്നും പറഞ്ഞിരുന്നു.
എന്നാൽ യാത്രക്കാരുടെ നിർദ്ദേശാനുസരണം ഡിജിയാത്ര ഉപയോഗിക്കുന്ന പ്രക്രിയ കൂടുതൽ ലളിതമാക്കുന്നതിനായി ഡിഐഎൽ പുതിയ സംരംഭം നടപ്പിലാക്കുകയായിരുന്നു. ഇതിനായാണ് പുതിയ അപഡേറ്റ് കൊണ്ടുവന്നത്. ഇതിലൂടെ ഇനി യാത്രക്കാർക്ക് ആപ്പ് ഡൗൺലോഡ് ചെയ്യേണ്ട ആവശ്യമില്ല. സാങ്കേതിക വിദ്യയിൽ പരിജ്ഞാനമില്ലാത്തവർക്ക് സഹായകരമാകും വിധം പ്രത്യേകം രൂപകൽപ്പന ചെയ്തിരിക്കുന്നതാണ് പുതിയ സംവിധാനം. ഇത് നിലവിൽ വരുന്നതോടെ രജിസ്ട്രേഷൻ പ്രക്രിയ ഒരു മിനിറ്റിനുള്ളിൽ കഴിയും.
Comments