കിരീടം ചൂടി ഇന്ത്യയുടെ പെൺപട; ഏഷ്യാ കപ്പ് കിരീടം നേടുന്നത് ആദ്യം; അഭിമാനമായി ഇന്ത്യൻ ജൂനിയർ വനിതാ ഹോക്കി ടീം

ടോക്കിയോ: ജപ്പാനിലെ ഗിഫു പ്രിഫെക്‌ചറിലെ കകമിഗഹാരയിൽ നടന്ന ഹോക്കി വനിതാ ജൂനിയർ ഏഷ്യാ കപ്പ് 2023-ൽ കിരീടം ചൂടി ഇന്ത്യ. കൊറിയയെ 2-1 എന്ന സ്‌കോറിന് പരാജയപ്പെടുത്തിയാണ് ഇന്ത്യൻ ജൂനിയർ വനിതാ ഹോക്കി ടീം ചാമ്പ്യന്മാരായത്. ഇന്ത്യക്കായി അന്നു, നീലം എന്നിവർ ഓരോ ഗോൾ വീതം നേടി. നിർണായക മത്സരത്തിൽ കൂട്ടായ പരിശ്രമമാണ് ടീമിനെ വിജയത്തിലേക്ക് നയിച്ചത്.

ഇതാദ്യമായാണ് വനിതാ ജൂനിയർ ഏഷ്യാ കപ്പ് കിരീടം ഇന്ത്യ നേടുന്നത്. കളിയുടെ 22-ാം മിനിറ്റിൽ പെനാൽറ്റി കോർണറിൽ നിന്ന് ആദ്യത്തെ ​ഗോൾ അടിച്ച് ഇന്ത്യ കൊറിയൻ വല കുലുക്കി. മൂന്ന് മിനിറ്റുകൾക്ക് ശേഷം കൊറിയും ഒരു പോയിന്റ് നേടി. 41-ാം മിനിറ്റിലാണ് വിജയത്തിലേക്കുള്ള രണ്ടാമത്തെ പോയിന്റ് ഇന്ത്യൻ ടീം സ്വന്തമാക്കിയത്.

അഭിമാന വിജയം സമ്മാനിച്ചതിന് പിന്നാലെ ഓരോ കളിക്കാർക്കും ഹോക്കി ഇന്ത്യ എക്‌സിക്യൂട്ടീവ് ബോർഡ് 2 ലക്ഷം രൂപ വീതം ക്യാഷ് പ്രൈസ് പ്രഖ്യാപിച്ചു. സപ്പോർട്ട് സ്റ്റാഫിന് 1 ലക്ഷം രൂപയും സമ്മാനിക്കും. ഇന്ത്യൻ ജൂനിയർ വനിതാ ടീമിന്റെ അഭിമാനകരമായ നേട്ടത്തെ ഹോക്കി ഇന്ത്യ പ്രസിഡന്റ് ഡോ. ദിലീപ് ടിർക്കി അഭിനന്ദിച്ചു.