ചണ്ഡീഗഡ്: പത്മ പുരസ്കാര ജേതാക്കൾക്ക് പ്രതിമാസം പതിനായിരം രൂപ പെൻഷൻ പ്രഖ്യാപിച്ച് ഹരിയാന മുഖ്യമന്ത്രി മനോഹർ ലാൽ ഖട്ടർ. പ്രതിമാസ പെൻഷന് പുറമെ പത്മശ്രീ, പത്മഭൂഷൺ, പത്മവിഭൂഷൺ, പുരസ്കാര ജേതാക്കൾക്ക് സർക്കാരിന്റെ വോൾവോ ബസ് സർവീസിൽ സൗജന്യയാത്രയും പ്രഖ്യാപിച്ചു. മുഖ്യമന്ത്രിയുടെ കർണാൽ സന്ദർശനത്തിലാണ് അദ്ദേഹം ഇക്കാര്യം അറിയിച്ചത്.
സംസ്ഥാനത്തെ ജനങ്ങളുടെ ക്ഷേമത്തിനായി മറ്റു നിരവധി ക്ഷേമ പദ്ധതികളും ആവിഷ്കരിച്ചിട്ടുണ്ടെന്നും അദ്ദേഹം പറഞ്ഞു. ഈ പദ്ധതികളിലൂടെ ജനങ്ങൾക്ക് നേരിട്ട് സേവനങ്ങൾ ലഭിക്കുമെന്നും അദ്ദേഹം പറഞ്ഞു. കൂടാതെ ധനസഹായ ഇനത്തിൽ നൽകുന്ന തുക നേരിട്ട് ജനങ്ങളുടെ അക്കൗണ്ടിൽ എത്തുമെന്നും അദ്ദേഹം കൂട്ടിച്ചേർത്തു.
ഒന്നരലക്ഷം രൂപവരെ വാർഷിക വരുമാനമുള്ള കുടുംബങ്ങൾക്ക് 5 ലക്ഷം രൂപവരെ ആരോഗ്യ ഇൻഷുറൻസും ഹരിയാന സർക്കാർ നൽകുന്നുണ്ട്. വാർഷിക വരുമാനം 1.5 ലക്ഷത്തിനും 3 ലക്ഷത്തിനും ഇടയിലുള്ള കുടുംബങ്ങൾക്ക് ആരോഗ്യ ഇൻഷുറൻസിന്റെ പ്രീമിയം തുക സർക്കാർ അടയ്ക്കുന്ന വിധത്തിൽ പദ്ധതി രൂപീകരിക്കുന്നത് പരിഗണനയിലാണെന്നും മുഖ്യമന്ത്രി അറിയിച്ചു. കൂടാതെ കുടുംബ ഐഡി കാർഡ് (പരിവാർ പെഹ്ചാൻ പത്ര) പദ്ധതി നടപ്പാക്കിയ ശേഷം സംസ്ഥാനത്ത് 12.5 ലക്ഷം പുതിയ ബിപിഎൽ റേഷൻ കാർഡുകൾ വിതരണം ചെയ്തു. നിലവിൽ സർക്കാർ ആരംഭിച്ച മെറിറ്റ് അധിഷ്ഠിത തൊഴിൽ സമ്പ്രദായം ജനങ്ങൾ സ്വീകരിച്ചതായും ഹരിയാന മുഖ്യമന്ത്രി പ്രതികരിച്ചു
Comments