ഡെറാഡൂൺ: ഉത്തരാഖണ്ഡ് വികസനത്തിന് 1,322 കോടി രൂപ അനുവദിച്ച പ്രധാനമന്ത്രി നരേന്ദ്രമോദിയ്‌ക്ക് നന്ദി അറയിച്ച് ഉത്തരാഖണ്ഡ് മുഖ്യമന്ത്രി പുഷ്‌കർ സിംഗ് ധാമി. സംസ്ഥാനത്ത് നടപ്പിലാക്കുന്ന വികസന പദ്ധതികളുടെ വിജയകരമായ നടത്തിപ്പിന് ഈ തുക സഹായകമാകുമെന്ന് മുഖ്യമന്ത്രി പറഞ്ഞു. ഉത്തരാഖണ്ഡിന്റെ വ്യോമഗതാഗതം ശക്തിപ്പെടുത്തുന്നതിനുള്ള വികസന പരിപാടിയുടെ ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം.
ഉത്തരാഖണ്ഡിന് എയ്റോഡ്രോം ലൈസൻസ് നൽകിയതിന് ശേഷം മുഖ്യമന്ത്രി പ്രധാനമന്ത്രിയ്‌ക്കും കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യയ്‌ക്കും നന്ദി പറഞ്ഞു. പിത്തോരഗഡിലെ നൈനി സൈനി വിമാനത്താവളത്തിനായുള്ള എയ്റോഡ്രോം ലൈസൻസ് ഡിജിസിഎ ആണ് ഉത്തരാഖണ്ഡിലെ സിവിൽ ഏവിയേഷൻ ഡെവലപ്മെന്റ് അതോറിറ്റിക്ക് (യുസിഎഡിഅ) കൈമാറിയത്. സംസ്ഥാനത്തെ വ്യോമഗതാഗത സൗകര്യങ്ങൾ ശക്തിപ്പെടുത്തുന്നതിനുള്ള വലിയ ചുവടുവയ്പ്പാണിതെന്ന് മുഖ്യമന്ത്രി ധാമി പ്രതികരിച്ചു.
എയ്റോഡ്രോം ലൈസൻസ് അനുവദിച്ച സാഹചര്യത്തിൽ സംസ്ഥാനത്തെ എല്ലാ ജനങ്ങൾക്കും ഇനി ലാൻഡിംഗ്, ടേക്ക്-ഓഫ് സൗകര്യം ലഭ്യമാകുമെന്നും ഉത്തരാഖണ്ഡ് മുഖ്യമന്ത്രി കൂട്ടിച്ചേർത്തു.
