പ്രായമായ പലരും പറയുന്ന സ്ഥിരം പരാതിയാണ് ഉറക്കമില്ലായ്മ. രാത്രി ഉറക്കം കിട്ടാതെ പ്രയാസപ്പെടുന്ന ഇക്കൂട്ടർക്ക് ഉറക്കക്കുറവ് മൂലം പല ആരോഗ്യപ്രശ്‌നങ്ങളും അനുഭവപ്പെടാറുണ്ട്. പ്രായമാകും തോറും വളർച്ചാ ഹോർമോണുകൾ ഉത്പാദിപ്പിക്കപ്പെടുന്നത് കുറയുന്നു. ഇതുമൂലം ശരീരത്തിലെ മെലാടോണിന്റെ തോതും കുറയുന്നു. അതുകൊണ്ടാണ് പ്രായമായവർക്ക് ഉറക്കപ്രശ്‌നങ്ങൾ പൊതുവെ അനുഭവപ്പെടുന്നത്.
ഇതുകൂടാതെ മറ്റ് പല കാരണങ്ങൾക്കൊണ്ടും പ്രായമായവരിൽ ഉറക്കക്കുറവ് അനുഭവപ്പെടാം.. ഉറങ്ങുന്നതിന് മുമ്പ് മദ്യം കഴിക്കുക, ടിവി, മൊബൈൽ എന്നിവ കണ്ടുകൊണ്ട് ഉറങ്ങുക തുടങ്ങിയവയെല്ലാം ഉറക്കമില്ലായ്മയിലേക്ക് നയിക്കും. അതിനാൽ ഉറങ്ങാൻ ഉതകുന്ന അന്തരീക്ഷത്തിൽ (ഇരുട്ട്, നിശബ്ദത) ഉറങ്ങാൻ ശ്രമിക്കുക.
മൂത്രാശയ രോഗങ്ങൾ മൂലം എപ്പോഴും മൂത്രശങ്ക ഉണ്ടാകുക, ശരീര വേദന, ആസ്ത്മ, പ്രമേഹം, നെഞ്ചെരിച്ചിൽ എന്നീ അസുഖങ്ങളുണ്ടാകുമ്പോഴും ഉറക്കക്കുറവ് ഉണ്ടായേക്കാം. അതിനാൽ ഇത്തരക്കാർ ഉറക്കമില്ലായ്മ പ്രശ്‌നം ഡോക്ടറെ അറിയിക്കേണ്ടതാണ്.
മാനസിക സമ്മർദ്ദം നേരിടുന്നുണ്ടെങ്കിൽ അതും ഉറക്കമില്ലായ്മയ്‌ക്ക് വലിയൊരു കാരണമാകാം. നല്ലൊരു സുഹൃത്തിനെ നേരിൽ കണ്ട് വിഷമങ്ങൾ പങ്കുവയ്‌ക്കുന്നത് സമ്മർദ്ദം ലഘൂകരിക്കാൻ ഒരുപരിധി വരെ സഹായിക്കും. പുകവലി, മദ്യപാനം എന്നിവ ഒഴിവാക്കുന്നതും കിടക്കുന്നതിന് മുമ്പ് പാട്ടു കേൾക്കുന്നതും നല്ല ഉറക്കത്തിന് ഗുണം ചെയ്യും. രാത്രി ഉറക്കം ഇല്ലെങ്കിൽ ഉച്ചനേരത്ത് ഉറങ്ങാതിരിക്കാനും ശ്രമിക്കേണ്ടതാണ്. ആവശ്യത്തിന് വ്യായാമം പതിവായി ചെയ്യുന്നതും രാത്രി ശരിയായി ഉറക്കം ലഭിക്കുന്നതിന് സഹായിക്കും.
