കേന്ദ്ര ഗതാഗതമന്ത്രി നിതിൻ ഗഡ്കരിയെ അഭിനന്ദിച്ച് സന്തോഷ് ജോർജ്ജ് കുളങ്ങര. കേരളത്തിലെ റോഡ് ഗതാഗതത്തിൽ വമ്പൻ മാറ്റങ്ങൾ സാധ്യമാക്കാൻ നിതിൻ ഗഡ്കരിക്ക് സാധിച്ചുവെന്ന് സന്തോഷ് ജോർജ്ജ് കുളങ്ങര അഭിപ്രായപ്പെട്ടു. ഇന്ത്യൻ ആഡ് ഫിലിം മേക്കേഴ്സ് അസോസിയേഷൻ സംഘടിപ്പിച്ച എക്സ്പേർട്സ് ടോക്കിൽ സംസാരിക്കുകയായിരുന്നു അദ്ദേഹം.
കേരളത്തിൽ 20 വർഷം മുമ്പ് വരെ നടക്കില്ലെന്ന് കരുതിയ ആറുവരി പാതയാണ് ഇപ്പോൾ സംസ്ഥാനത്ത് നിർമ്മിച്ചുകൊണ്ടിരിക്കുന്നത്. കേരള സർക്കാരിന്റെ സഹകരണവും പിന്തുണയുമുണ്ടെങ്കിലും പദ്ധതി യാഥാർത്ഥ്യമാക്കിയത് കേന്ദ്രസർക്കാരാണ്. 15 കൊല്ലം മുമ്പ് വരെ വലിയ പ്രതിഷേധം കണ്ടതാണ്. ദേശീയ പാത വരുന്നതിന്റെ ഭാഗമായി സ്ഥലമെടുക്കുന്നതിന്റെ പേരിലായിരുന്നു പ്രതിഷേധമുയർന്നത്. ആ പ്രതിഷേധം എങ്ങനെയാണ് ഇല്ലാതായതെന്നത് ശ്രദ്ധേയമാണ്.
പ്രതിഷേധത്തിന്റെ കാരണമെന്താണെന്ന് കണ്ടെത്തി കേന്ദ്ര സർക്കാർ അതുപരിഹരിച്ചു. എല്ലാവരുടെയും പ്രതിഷേധത്തിന്റെ കാരണമെന്തായിരുന്നു? നഷ്ടപരിഹാരം.. അത് ലഭിച്ചപ്പോൾ പ്രതിഷേധക്കാർ സൈലന്റായി. കേരളത്തിൽ കാസർകോട് മുതൽ തിരുവനന്തപുരം വരെ പണി നടക്കുന്ന ഹൈവേകളുടെ വക്കുകളിൽ എവിടെയും ഇന്ന് അപശബ്ദമില്ല. പ്രായോഗിക ബുദ്ധിയുള്ള രാഷ്ട്രീയ സംവിധാനമാണ് നമുക്കാവശ്യം. അതിന് തലപ്പത്തുള്ളവർ പ്രായോഗിക ബുദ്ധി പ്രയോഗിക്കുന്നവരാകണം. പദ്ധതികൾ ഫലവത്തായി നടപ്പിലാക്കാൻ കൂടി കഴിവുള്ളവരാകണം. അതിലാണ് കാര്യമെന്നും സന്തോഷ് ജോർജ്ജ് കുളങ്ങര പറഞ്ഞു.
Comments