ഓൺലൈൻ മുഖേന ഫുഡ് ഡെലിവറി നടത്താത്തവർ ചുരുക്കമായിരിക്കും. വിരൽത്തുമ്പിൽ ആഗ്രഹിക്കുന്നത് കിട്ടുമെന്നായതോടെ നമ്മുടെയൊക്കെ ജീവിതം വളരെ ലളിതമായി എന്നതാണ് വാസ്തവം. കയ്യിലൊരു ഫോണും ഇന്റർനെറ്റുമുണ്ടെങ്കിൽ ഇഷ്ടമുള്ളിടത്ത് ഭക്ഷണം കൊണ്ടെത്തിക്കാൻ ഇന്ന് കഴിയും. എന്നാൽ ജനപ്രിയ ഫുഡ് ഡെലിവറി ആപ്ലിക്കേഷനുകളുടെ തിരശ്ശീലയ്ക്ക് പിന്നിൽ നിരവധി ആളുകളുടെ അധ്വാനമുണ്ടെന്ന കാര്യം നാം പലപ്പപോഴും ചിന്തിക്കാറില്ല. ഡെലിവറി എക്സിക്യൂട്ടീവുകളുടെ കഠിനമായ ജോലി സാഹചര്യങ്ങളുടെ പേരിൽ ഈ ആപ്ലിക്കേഷനുകൾ വിമർശിക്കപ്പെട്ട നിരവധി സന്ദർഭങ്ങളും മുൻപ് ഉണ്ടായിട്ടുണ്ട്.
തുച്ഛമായ വേതനത്തിൽ ഏറെ നേരം ജോലി ചെയ്യേണ്ടി വരുന്ന സാഹചര്യമാണ് ഇവർക്ക് നിലവിലുള്ളത്. ഇപ്പോഴിതാ സമൂഹമാദ്ധ്യമങ്ങളിൽ പ്രചരിച്ചുകൊണ്ടിരിക്കുന്നതും അത്തരത്തിൽ ഒരു ദൃശ്യമാണ്. ഇത് വൈറലായതോടെ ഇക്കാര്യം വീണ്ടും ചർച്ചയ്ക്ക് വഴിവെച്ചിരിക്കുകയാണ്. ഒരു സൊമാറ്റോ ഏജന്റ് പ്ലാസ്റ്റിക് ബാഗിൽ നിന്ന് ഭക്ഷണം കഴിക്കുന്ന വീഡിയോയാണ് വൈറലായിരിക്കുന്നത്.
ഐഎഎസ് ഉദ്യോഗസ്ഥൻ അവനീഷ് ശരൺ ആണ് വീഡിയോ ട്വിറ്ററിലൂടെ പങ്കുവച്ചത്. ”ഈ കഠിനമായ കാലാവസ്ഥയിൽ ഈ തൊഴിലാളികളെ കൂടി പരിഗണിക്കൂ എന്ന അടിക്കുറിപ്പോടെയായിരുന്നു അദ്ദേഹം വീഡിയോ ട്വിറ്ററിലൂടെ പങ്കുവെച്ചത്. 20 സെക്കൻഡ് ദൈർഘ്യമുള്ള വീഡിയോ ഇതിനോടകം നിരവധി പേരാണ് കാണുകയും ഷെയർ ചെയ്തിരിക്കുന്നത്..
വീഡിയോയിൽ ഒരു റെസിഡൻഷ്യൽ ഏരിയയിൽ സൊമാറ്റോ ഡെലിവറി ബോയ് ഇടവേള എടുത്ത് ഭക്ഷണ കഴിക്കുന്നത് കാണാം. ഇരുന്നു ഭക്ഷണം കഴിക്കാൻ സമയമില്ലാത്തതിനാൽ തന്റെ ബൈക്കിനടുത്ത് നിന്ന് ഒരു പ്ലാസ്റ്റിക് ബാഗിൽ നിന്ന് ഭക്ഷണം കഴിക്കുന്നതാണ് വീഡിയോയിലുള്ളത്. ഇങ്ങനെ ഡെലിവറി ഏജന്റ് പ്ലാസ്റ്റിക് ബാഗിൽ നിന്ന് ഉച്ചഭക്ഷണം കഴിക്കുന്നതിന്റെ വീഡിയോയോട് നിരവധി പേരാണ് ഇതിനോടകം പ്രതികരിച്ചിരിക്കുന്നത്. അവരുടെ പ്രയത്നത്തിന് കൂടുതൽ അംഗീകാരം അർഹിക്കുന്നുണ്ടെന്നും സമാധാനമായി ഭക്ഷണം കഴിക്കാൻ പോലും അവർക്ക് സമയം കിട്ടാത്തത് ഹൃദയഭേദകമാണെന്നും ആളുകൾ വീഡിയോയ്ക്ക് താഴെ കമന്റ് ചെയ്തു.
