മലയാള സിനിമയിൽ ഒരിടവേളയ്‌ക്ക് ശേഷം ലഹരി വിവാദത്തിന് തിരികൊളുത്തിയ ആർഡിഎക്‌സ് എന്ന ചിത്രത്തിന്റെ ടീസർ പുറത്തിറങ്ങി. തട്ടുപൊളിപ്പൻ ആക്ഷൻ രംഗങ്ങൾ കോർത്തിണക്കിയ ടീസറിന് വമ്പൻ പ്രതികരണമാണ് സാമൂഹമാദ്ധ്യമങ്ങളിൽ ലഭിക്കുന്നത്. നവാഗതനായ നഹാസ് ഹിദായത്ത് സംവിധാനം ചെയ്യുന്ന ചിത്രത്തിൽ ഷെയ്ൻ നിഗം, ആന്റണി വർഗീസ്, നീരജ് മാധവ് എന്നിവരാണ് അണിനിരക്കുന്നത്. പവർ പാക്ക്ഡ് ആക്ഷൻ സിനിമയാകുമെന്നാണ് ടീസർ നൽകുന്ന സൂചന.
കെ ജി എഫ്, വിക്രം, ബീസ്റ്റ് തുടങ്ങിയ സൂപ്പർ ഹിറ്റ് ചിത്രങ്ങൾക്ക് സംഘട്ടനം ഒരുക്കിയ അൻപ് അറിവാണ് ആക്ഷൻ കൊറിയോഗ്രഫർ. ബാബു ആന്റണി, ലാൽ, ഐമ റോസ്മി സെബാസ്റ്റ്യൻ, മഹിമ നമ്പ്യാർ, മാല പാർവതി, ബൈജു തുടങ്ങിയവരാണ് മറ്റ് താരങ്ങൾ.
ആദർശ് സുകുമാരൻ, ഷബാസ് റഷീദ് എന്നിവരുടേതാണ് തിരക്കഥ. ഛായാഗ്രഹണം അലക്സ് ജെ പുളിക്കൽ, സംഗീതസംവിധാനം സാം സി എസ്, ഗാനങ്ങൾ – മനു മഞ്ജിത്. ഓണം റിലീസായി ആഗസ്റ്റ് 25നാണ് സിനിമ റിലീസ് ചെയ്യുന്നത്. വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ ആണ് നിർമ്മാണം. പി ആർ ഒ: ശബരി.
