ജൂലൈ 3ന് ആരംഭിക്കുന്ന വിംബിൾഡണിൽ മത്സരിക്കാനൊരുങ്ങി വിരമിക്കൽ പ്രഖ്യാപിച്ച സാനിയാ മിർസ. ഈ വർഷം ആദ്യം പ്രൊഫഷണൽ ടെന്നീസിൽ നിന്ന് വിരമിച്ച താരം വിംബിൾഡൺ ടൂർണമെന്റിൽ ലേഡീസ് ലെജൻഡ്സ് ഇൻവിറ്റേഷൻ വിഭാഗത്തിലാണ് മത്സരിക്കുക. ബ്രിട്ടന്റെ ജോഹന്ന കോണ്ടയോടൊപ്പമാണ് ലേഡീസ് ലെജൻഡ്സ് ഇൻവിറ്റേഷൻ ഡബിൾസ് വിഭാഗത്തിൽ സാനിയാ മിർസ ജോഡിയാകുന്നത്.
സാനിയ മിർസയുടെ മുൻ ഡബിൾസ് പങ്കാളിയായ മാർട്ടിന ഹിംഗിസ്, നാല് തവണ ഗ്രാൻഡ്സ്ലാം സിംഗിൾസ് ചാമ്പ്യൻ കിം ക്ലൈസ്റ്റേഴ്സ് എന്നിവരുൾപ്പെടെ വിരമിച്ച മറ്റ് താരങ്ങളും ടൂർണമെന്റിൽ പങ്കെടുക്കും. കിം ക്ലൈസ്റ്റേഴ്സ്, മാർട്ടിന ഹിംഗിസ്, ഫ്രാൻസെസ്ക ഷിയാവോൺ, റോബർട്ട വിഞ്ചി എന്നിവർ ഉൾപ്പെടുന്ന ഗ്രൂപ്പ് ബിയിലാണ് സാനിയാ മിർസ. കാരാ ബ്ലാക്ക്, വിരമിക്കൽ പ്രഖ്യാപിച്ച കരോലിൻ വോസ്നിയാക്കി, ഡാനിയേല ഹന്റുചോവ, ലോറ റോബ്സൺ, ലിനാ, അഗ്നിസ്ക റഡ്വാൻസ്ക എന്നിവരാണ് മറ്റ് ഗ്രൂപ്പിലുള്ളത്.
വിംബിൾഡണിൽ ഇന്ത്യയുടെ പങ്കാളിത്തം രോഹൻ ബൊപ്പണ്ണയിൽ മാത്രമായിരിക്കും. പുരുഷ ഡബിൾസിൽ ഓസ്ട്രേലിയൻ താരമായ മാത്യു എബ്ഡനുമായി 43 കാരനായ താരം പങ്കാളിയാകും. പുരുഷ ഡബിൾസ് മത്സരത്തിന്റെ ആദ്യ റൗണ്ടിൽ ഇന്ത്യ-ഓസ്ട്രേലിയൻ ജോഡി അർജന്റീനിയൻ ജോഡികളായ ഗില്ലെർമോ ഡുറാൻ-തോമസ് മാർട്ടിൻ എച്ചെവേരി സഖ്യത്തെ ജൂലൈ 5ന് നേരിടും. വർഷാവസാനം ഡേവിസ് കപ്പിൽ നിന്ന് വിരമിക്കുമെന്നും ശരീരം അനുവദിക്കുന്നിടത്തോളം എടിപി ഇവന്റുകളിൽ ശ്രദ്ധ കേന്ദ്രീകരിക്കുമെന്നും പ്രഖ്യാപിച്ച ബൊപ്പണ്ണ തന്റെ പതിമൂന്നാം വിംബിൾഡണായിരിക്കും ലണ്ടനിലെ പുൽമൈതാനത്ത് കളിക്കുക.
