കുന്നത്തുനാട് എംഎൽഎ പി വി ശ്രീനിജന് മേൽ കുരുക്ക് മുറുകുന്നു. ശ്രീനിജന്റെ സ്വത്ത് വിവരങ്ങളിൽ കൂടുതൽ വ്യക്തത തേടി ആദായ നികുതി വകുപ്പ്. സിനിമാമേഖലയിലെ സാമ്പത്തിക ഇടപാടിൽ ശ്രീനിജനെ ആദായ നികുതി വകുപ്പ് ചോദ്യം ചെയ്തിരുന്നു. കഴിഞ്ഞ ദിവസം കൊച്ചിയിലെ ഓഫീസിൽ വച്ചായിരുന്നു ചോദ്യം ചെയ്യൽ. സിനിമാ നിർമ്മാതാവ് ആന്റോ ജോസഫിൽ നിന്ന് വാങ്ങിയ പണം സംബന്ധിച്ചാണ് ആദായ നികുതി വകുപ്പ് അന്വേഷിച്ചത്.
പി.വി ശ്രീനിജന്റെ എല്ലാ സാമ്പത്തിക ഇടപാട് രേഖകളും പരിശോധിക്കും. നിർമ്മാതാവ് ആന്റോ ജോസഫിൽ നിന്ന് പണം വാങ്ങിയതെന്തിനെന്നും, മടക്കി നൽകാനായതിന്റെ സാമ്പത്തിക സ്രോതസും ശീനിജൻ വ്യക്തമാക്കണം. ബാങ്ക് ഇടപാട് രേഖകൾ ഹാജരാക്കാനും ആദായ നികുതി വകുപ്പ് പി വി ശ്രീനിജനോട് നിർദ്ദേശിച്ചിട്ടുണ്ട്.
2015-ൽ നികുതിയടക്കാൻ 65 ലക്ഷം രൂപ ആന്റോ ജോസഫിൽ നിന്ന് കടമായി വാങ്ങിയിരുന്നുവെന്നും 2022-ൽ തിരിച്ചുനൽകിയെന്നുമാണ് ചോദ്യം ചെയ്യലിൽ ശ്രീനിജന്റെ മൊഴി. കൊച്ചിയിലെ ഓഫീസിലേക്ക് വിളിച്ചുവരുത്തിയുള്ള ചോദ്യം ചെയ്യൽ നാലുമണിക്കൂറോളമാണ് നീണ്ടത്.
സിനിമാ മേഖലയിൽ ശ്രീനിജൻ കൂടുതൽ പണം ഇറക്കിയിരുന്നോയെന്നും കണ്ടെത്തും. സിനിമാ താരങ്ങളുടെയും, നിർമ്മാതാക്കളുടെയും വീടുകളിൽ ആദായ നികുതി വകുപ്പ് റെയ്ഡ് നടത്തിയിരുന്നു. ആന്റോ ജോസഫിന്റെ വീട്ടിൽ ആദായ നികുതി വകുപ്പ് നടത്തിയ പരിശോധനയിലാണ് ശ്രീനിജനുമായുള്ള പണമിടപാടുകൾ സംബന്ധിച്ച രേഖകൾ കണ്ടെത്തിയത്. തുടർന്ന് ശ്രീനിജനെ ചോദ്യം ചെയ്യുന്നതിന് വിളിച്ചു വരുത്തുകയായിരുന്നു. ആദായനികുതി വകുപ്പിന്റെ അന്വേഷണവും പുരോഗമിക്കുമ്പോൾ ശ്രീനിജനു മേൽ കുരുക്ക് മുറുകുകയാണ്.
