വെസ്റ്റ് ഇൻഡീസിനെതിരായ ഇന്ത്യയുടെ ടെസ്റ്റ് പരമ്പരയിൽ അരങ്ങേറ്റം കുറിക്കാനൊരുങ്ങി യുവതാരം യശസ്വി ജെയ്‌സ്വാൾ. അണ്ടർ 19 ലോകകപ്പിൽ ഇന്ത്യയ്‌ക്കായി തകർപ്പൻ പ്രകടനം നടത്തിയിരുന്ന താരത്തിന് ആദ്യമായാണ് ഇന്ത്യൻ ടീമിലേക്ക് വിളി വന്നത്. ഐപിഎൽ 16-ാം സീസണിൽ താരം രാജസ്ഥാൻ റോയൽസിന് വേണ്ടി നടത്തിയ പ്രകടനം അതിശയിപ്പിക്കുന്നതായിരുന്നു. ഇതോടെയാണ് ടെസ്റ്റ് ടീമിൽ യശസ്വിയെ ബിസിസിഐ ഉൾപ്പെടുത്തിയത്.
ഇന്ത്യയും വെസ്റ്റ് ഇൻഡീസും തമ്മിലുളള ആദ്യ ടെസ്റ്റ് ജൂലൈ 12 മുതൽ ഡൊമിനിക്കയിലെ വിൻഡ്സോർ പാർക്കിലാണ്.അതിന് മുന്നോടിയായി ഇന്ത്യൻ താരങ്ങൾ പരിശീലന മത്സരം ആരംഭിച്ചിട്ടുണ്ട്. ഇന്ത്യൻ കളിക്കാർക്ക് പുറമെ വിൻഡീസിന്റെ ഫസ്റ്റ് ക്ലാസ് ക്രിക്കറ്റ് കളിക്കുന്ന എട്ട് കളിക്കാരും പരിശീലന മത്സരത്തിൽ സഹകരിക്കുന്നുണ്ട്. ഇന്ത്യൻ താരങ്ങൾ തന്നെ രണ്ട് ടീമുകളിലായി അണിനിരന്നാണ് രണ്ട് ദിവസത്തെ പരിശീലന മത്സരം കളിക്കുന്നത്.
ചില സർപ്രൈസുകളുമായാണ് ടീം ഇന്ത്യ പരിശീലന മത്സരത്തിന് ഇറങ്ങിയത്. ക്യാപ്റ്റൻ രോഹിത് ശർമക്കൊപ്പം ഓപ്പണറായി ഇറങ്ങിയത് യശസ്വി ജെയ്‌സ്വാളാണ്. പ്ലേയിംഗ്് ഇലവനിൽ സർപ്രൈസ് ഒരുക്കുമെന്നുളളതിന്റെ സൂചനയാണ് പരിശീലന മത്സരത്തിലൂടെ ആരാധകർക്ക് മുന്നിലെത്തുന്നത്. നിലവിൽ ശുഭ്മാൻ ഗില്ലും രോഹിത് ശർമ്മയുമാണ് ടീം ഇന്ത്യയുടെ നിലവിലെ ഓപ്പണർമാർ. എന്നാൽ യശസ്വി വന്നാൽ ലെഫ്റ്റ് – റൈറ്റ് ഓപ്പണിങ് സഖ്യം ഇന്ത്യയ്‌ക്ക് ടെസ്റ്റിൽ പരീക്ഷിക്കാവുന്നതാണ്. അങ്ങനെയെങ്കിൽ ടീമിൽ ഇടമില്ലാത്ത പുജാരയ്‌ക്ക് പകരം മധ്യനിരയിൽ അരങ്ങേറുക ശുഭ്മാൻ ഗില്ലായിരിക്കും. പുജാരയ്‌ക്ക് പകരമായാണ് ഇന്ത്യ വിൻഡീസ് പര്യടനത്തിൽ യശസ്വിയെ ഉൾപ്പെടുത്തിയത്. ഏതായാലും ഏറെക്കാലമായി ടെസ്റ്റിൽ ഇന്ത്യൻ മധ്യനിരയിൽ കളിക്കുന്ന പുജാരയ്‌ക്ക് പകരക്കാരനെ ഇന്ത്യ ഈ പരമ്പരയിൽ കണ്ടെത്തും. യശസ്വിയ്‌ക്ക് പുറമെ യുവതാരം ഋതുരാജ് ഗെയ്ക്വാദും ടീമിലുണ്ട്.
പരിശീലന മത്സരത്തിൽ രോഹിത് ശർമ മികച്ച ഫോമിലാണ് കളിച്ചത്. ജെയ്‌ദേവ് ഉനദ്കദിന്റെ പന്തിൽ സിക്‌സർ പറത്തി രോഹിത് തന്റെ ക്ലാസ് തെളിയിച്ചു. ലോക ടെസ്റ്റ് ചാമ്പ്യൻഷിപ്പ് ഫൈനൽ കഴിഞ്ഞ് ഏകദേശം ഒരു മാസത്തോളമായി ഇന്ത്യൻ ടീം മത്സരങ്ങളൊന്നും തന്നെ കളിക്കുന്നില്ല. ഐപിഎല്ലിലും ഇത്തവണ രോഹിത് അത്ര ഫോമിലായിരുന്നില്ല. നായകൻ ഫോമിലേക്ക് മടങ്ങിയെത്തേണ്ടത് ഇന്ത്യയ്‌ക്ക് നിർണായകമാണ്.
മറുഭാഗത്ത് മുൻ നായകൻ വിരാട് കോഹ്‌ലി നിരാശപ്പെടുത്തുകയാണ് ചെയ്തത്. ഉനാദ്കദിന്റെ പന്തിൽ സ്ലിപ്പിലെ ഫീൽഡർക്ക് അനായാസ ക്യാച്ച് നൽകിയാണ് താരം മടങ്ങിയത്. കഴിഞ്ഞ കുറച്ച് മത്സരങ്ങളായി കോഹ്‌ലി ടെസ്റ്റിൽ അത്ര മികച്ച ഫോമിലല്ല കളിക്കുന്നത്. കോഹ്‌ലിയുടെ തിരിച്ചുവരവ് ഇന്ത്യൻ മധ്യനിരയെ സംബന്ധിച്ചിടത്തോളം നിർണായകമാണ്. ഐപിഎല്ലിൽ ആർസിബിയ്‌ക്ക് വേണ്ടി താരം മികച്ച ഫോമിൽ കളിച്ചിരുന്നു.
